【《木蘭辭》揾答案 】點解佢代父從軍12年都冇畀人發現女兒身?

Leng Zai @ UPower

其實都唔洗諗得咁複雜,可能花木蘭本身就生得似男人。

網上圖片

《花木蘭》真人電影已經公布左預告,唔同觀眾都對劉亦菲有唔同嘅意見,有人覺得佢英氣人逼人相當適合做木蘭,但都有人覺得劉亦菲太靚女,唔太啱上沙場殺敵。今次就想同大家一齊重温一下《木蘭辭》,睇下嘗試重新認識返花木蘭,先再諗下劉亦菲係唔係最佳人選。

網上圖片

基本上大家都應該知道花木蘭女扮男裝,代父從軍嘅故仔,「同行十二年,不知木蘭是女郎」。點解十二年都冇人發現到木蘭係女人呢件事呢?我地試下喺《木蘭辭》入面推敲。

網上圖片

首先可由木蘭嘅出生地去睇返,《木蘭辭》係北魏時期嘅樂府詩作品,「旦辭黃河去,暮至黑山頭」、「但聞燕山胡騎鳴啾啾」可以睇到當時北魏對柔然嘅戰爭,黑山即係沙虎山(內蒙古呼和浩特市東南),喺黃河附近。而燕山即係燕然山(今蒙古人民共和國杭愛山)。兩個地方都漠北地區,所以花木蘭就應該係北方人。而且,北魏係鮮卑人政權,所以木蘭可能係遊牧民族嘅鮮卑人,細細個就喺馬背揾食,體能應該拍得住男人。

網上圖片

其次就係木蘭嘅兵種,「萬里赴戎機,關山度若飛」描寫木蘭行軍嘅情形,但係大軍行動係唔可以隨意走動,所以好似木蘭咁飛山度水的話,佢就應該唔係前線兵種。由此而推斷,木蘭應該係「斥候」部隊,即係負責偵察、候望敵情,屬於偵察兵。木蘭平日執行偵察同間諜任務,工作性質須要高度保密,所以佢平日應該係有好多獨處時間,唔洗成日同其他軍人一齊。就算要上前線作戰都好,打緊嗰陣都唔會成日都係同一班人喺同一個地方,所以都好難發現。

網上圖片

仲有就係木蘭嘅軍階,「策勳十二轉,賞賜百千強」當中嘅「十二轉」係最高受勳等級,可以見到木蘭屢立戰功,唔會係個普通士兵,可能會有自己嘅帳篷,有私人空間仲難畀人發現到女人。就算有手下懷疑佢係女人,都唔會夠膽問。

網上圖片

咁點解木蘭冇畀人發現過嚟M?其實打仗點會唔流血?所以發現唔到好正常。

Tagged:

Facebook Conversations