【盂蘭節】鬼月睇鬼片 三部值得一睇再睇港產猛鬼之作

Leng Zai @ UPower

今次推薦三部鬼片嘅兩個共通點:(一) 鬼係唔會同你講道理,冇惡鬼會想同你對話,佢地只想你死;(二) 去到最後都係要靠自己同厲鬼對抗,那怕玉石俱焚。

網上圖片

1.《鬼眼》1974

網上圖片

由邵氏出品,CULT片大師桂治洪早期執導、倪匡編劇電影《鬼眼》。電影故事講述女主角寶玲喺一間上海飛髮鋪打工幫客人修甲,佢收工嘅時候意外跌爛眼鏡,之前幫襯過佢嘅靚仔客人仲傑係眼鏡鋪老闆,佢主動要求免費幫寶玲配隱形眼鏡。但寶玲戴左之後就頻頻撞鬼,原來仲傑喺三年前已經因為大火而燒死左,原來仲傑係鬼!

網上圖片

寶玲不但冇辦法擺脫仲傑呢隻猛鬼,仲多次畀仲傑侵犯。之後仲要幫仲傑誘騙鋪頭嘅年輕貌美嘅女同事,供猛鬼享用。其後寶玲揾道士幫手驅鬼,但仲傑係猛鬼,佢借寶玲之手殺死道士,就連佢男朋友都慘死。之後寶玲畀同事送到住喺鄉下沙田嘅姨婆屋企(當時沙田仲係鄉下),但點知仲傑照樣跟埋過去,仲要搞埋姨婆個孫女阿秀。最後寶玲同阿秀決定同猛鬼仲傑決戰,但最後寶玲都逃唔過畀猛鬼附身嘅命運。

2.《凶榜》1982

網上圖片

《凶榜》號稱係開埠以嚟最恐怖嘅港產鬼片,由新浪潮導演余允抗執導,同時《凶榜》亦都係香港新浪潮電影嘅里程碑。《凶榜》故事講述男主角秦祥林同余綺霞係一對年輕夫妻,老婆喺呢個時大肚。為左屋企生計嘅秦祥林就做左大廈嘅夜更看更,但秦祥林入職之後,佢身邊嘅同事全部離奇慘死。之後秦祥林識左捉鬼大師岳華先知道自己係陰時陰月陰日出世,注定猛鬼纏身。因為秦祥林做嘢嘅大廈以前係拐子佬專殺小朋友嘅大本營,佢畀一隻「猛鬼紅衫仔」睇中,想要投胎做佢個仔,所以連佢老婆都無法倖免。

網上圖片

因為之前師傅同秦祥林講過,如果喺天光之前都消滅唔到隻鬼,就姐代表隻鬼成功投胎,佢自己、老婆同BB都會變成妖孽殘害世人。而不幸地,BB成功出世,秦祥林最後拎住斧頭劈死孽種。喺《凶榜》入面,所有畀厲鬼殺死嘅都唔壞人,做過最衰嘅事就係講粗口。而最大受害者秦祥林就更加係心地善良嘅好人,只係佢唔好彩生壞命。點解秦祥林明知大廈有鬼都仲要返工?一來佢係個普通嘅香港人,一定要返工。二來佢嘅命運注定左,無論點樣都會畀惡鬼纏身,點走都冇用。

3.《熱血青年》2002

網上圖片

《熱血青年》係鄭保瑞早期執導之作,周麗淇主演,當年鄭保瑞仲未拍《大鬧天宮》系列。《熱血青年》故事講述三個擁有特殊血型嘅後生仔,因為響應呼籲捐血去救一對割脈殉情嘅情侶。結果女方死左,男嘅變成植物人,於是死者變成怨靈,報復三人,仲想逼佢地殺死男朋友先肯算數。

網上圖片

最後周麗淇以為只要殺左女鬼男友,就可以救返自己嘅愛人(其中一位捐血嘅青年),最後原來愛人早就死左,周麗淇變相白白殺人。而結局都惹嚟唔少觀眾解讀,有人覺得周麗淇畀女鬼支配左,悲劇收場。

Facebook Conversations