【世界盃Q and A】潘文迪鼓勵新一代努力：被睇低更加要爭氣

2019年09月10日 10:24 am

港足港足

吳家祺 @ UPower

潘文迪的世界盃記憶，由何時開始？

潘文迪效力香港隊多年，退役後一度出任港隊助教。資料圖片

潘文迪，曾是香港代表隊成員，司職中場，球員時代曾經效力東方、南華、晨曦、愉園等球會，現為港超聯球隊愉園董事。

球員時代的阿迪青靚白淨，是贊助商辦足球類活動的寵兒。資料圖片

資料圖片

Q. 你第1次睇世界盃，係邊一屆，有咩深刻記憶?

A. 第一次係1986年墨西哥世界盃，當時我9歲，最深印象係馬勒當拿。當時我開始玩樂性質咁踢足球，屋企人睇世界盃，我又睇。當時只係知道馬勒當拿，好勁，印象好模糊，只係諗佢咁矮又咁勁？

之後，好認真睇應該係1998年法國世界盃。以前無咁多波睇，當時體院年代在宿舍住，平時一早瞓著準備翌晨練波，直到1998年，已經出來踢職業球隊，先真真正正睇世界盃，大約係咁。

馬勒當拿在1986墨西哥世界盃奠定球王地位。 AP圖片

Q. 自己踢過幾多屆世界盃，入選香港隊? 形容一下踢世界盃的感受?

A. 我踢咗好多年香港隊，由奧運隊開始。記得1995、96年，皇朝盃，當時係新人咁入選過，因為同期太多人，自己只是出道不久。自己的港隊生涯斷斷續續，要睇有冇得踢，自己是可以踢到不同位置。

我踢香港隊的最深印象，應該是2006年世界盃亞洲區外圍賽，當時抽中和中國隊交手，我全部有份踢。當年中國隊主力是鄭智和李瑋鋒等，最記得是北上廣州那一場。(香港隊輸0：7，但因淨勝球差不及中國而出局，范俊業在比賽過程中撲出鄭智12碼，因此一戰成名。)

當年香港隊出線機會渺茫，但全隊人都好努力踢，要為香港出一分力，記得那時候黎Sir帶隊，他滿意那一屆香港隊的整體表現。那場比賽作客廣州很有打仗感覺(2004年11月17日，香港隊作客廣州0：7負中國)，因為中國隊正在爭出線，他們非常緊張。我們住的酒店包了一層樓，有保安在樓層門口把守，下令不可以走出酒店，要確保一切安全。平常也有機會離開酒店散步放鬆，但那一次完全沒有。

2004年進行的06世界盃外圍賽，潘文迪緊追鄭智。受訪者提供圖片

范俊業在2004年的世界盃外圍賽鬥中國左飛右撲。 Getty圖片

已故的黎新祥教練帶領香港隊征戰多年。資料圖片

Q. 歷來咁多個香港球星之中，自己最欣賞邊個，點解? 有份踢香港隊，你覺得咁至係有球星的身份嗎？

A. 踢香港隊等於球星? 可能香港市場比較細，好多人概念係咁。但其實好多球員無入選香港隊，但在所屬球會踢得好好，只是戰術運用不同未必可以成為港將，特別是前鋒、龍門位置更是非常難爭。至於中場，可能教練鍾意瘋搶型、有些教練喜歡用波型，都要看那一期的香港隊教練要求甚麼。

以前，球員會樹立形象，有個人特點讓人記憶深刻。好似和哥李健和，唔洗講，落底線出波，一定有呢樣。山度士，中場推波、踢法靈活，射波又好，這些都是他的特性。又好似阿雞羅繼華，技術好純熟，偉仔譚兆偉跑動、傳送及入楔埋門威力都好好，各有特色。現代球員平均化咗，每樣都有一些，但一定要有你個人特點，球迷先會記得起你。

長頭髮的李健和非常瀟灑，招牌菜是底線傳中。受訪者相片

山度士的腳法和頭腦得到球迷欣賞。資料圖片

Q. 除左香港隊之外，你最鍾意邊一支國家隊，點解咁欣賞對方?

A. 細個中意巴西，羅馬里奧，白必圖，卡富上一代的右閘(佐真奴)都係非常好睇的球星，近年就喜歡睇西班牙。羅馬里奧，我細細個就睇佢踢波，佢真係好好技術。禁區內，佢一攞波，對手mark佢唔到。鞋頭篤、快腳射，往往就有入波。

另一位欣賞的巴西球星是鄧加，自己出道時位置和他相同，他在這個位置真是處理得好好。後來他去了踢磐田山葉，我在南華和他同場踢過，他的長傳真是一流。

自己算好運氣，在不少外隊賽事都有上場，曼聯來咁多次香港，我現役時都有和他們踢過，他們真係好勁。巴塞隆拿來港，我踢愉園傑志聯隊有落場，亨利、恩尼斯達、朗拿甸奴都有交手。恩尼斯達又矮又好波，同場較量感覺更深刻。但最深印象都是「細哨」朗拿甸奴，看他熱身時動作好慢，好似不太犀利，但一落場「打真軍」時速度快好幾倍，完全追不到，可見每個球星的熱身和特性都是不同。