《侏羅紀世界3》外傳上線啦！ 8分鐘外傳上載YouTube任睇唔嬲
睇嚟第三集係同《侏羅紀公園：迷失世界》差唔多，都係講恐龍殺入大城市。
2015年上畫嘅《侏羅紀世界》成功收割16億美金嘅全球票房，第二集嘅《侏羅紀世界：迷失國度》賣坐依然。首部曲導演哥連卓法羅將會回歸執導第三集，鎖定2021年上畫，導演仲專誠拍左個8分鐘嘅外傳《侏羅紀世界：巨石之戰》畀觀眾止下痕。
網上圖片
雖則要等多兩年先有得睇《侏羅紀世界3》，但係導演哥連卓法羅就去左愛爾蘭取景，用五日時間拍左一條8分鐘嘅短片《侏羅紀世界：巨石之戰》，故事嘅背景發生喺《侏羅紀世界：迷失國度》嘅一年之後。
網上圖片
喺第二集就講到有錢佬研究複製恐龍技術，仲喺自個莊園整左個恐龍館，將唔同種類嘅恐龍亂咁合成複製，整做軍事武器拍賣畀唔同國家。最後搞出個大頭佛，全部恐龍殺入都市冇王管。已經預示左第三集嘅故事所有恐龍會喺大都會入面四圍大肆破壞。
網上圖片
今次嘅外傳《侏儸紀世界：巨石之戰》，講述五口之家原本諗住去露營，點知就撞正大鼻角龍母子喺度揾食，不過就虛驚一場。但係，故事中段就見到一隻暴特龍殺到，仲想食埋主角一家人。為左保護小朋友，兩位主角徒手同異特龍搏鬥。
網上圖片
喺今次短片入面見到嘅大鼻角龍，外型同三角龍好似，係近年先發現嘅新品種，係喺白堊紀晚期嘅南美洲出沒。呢種恐龍性格比較溫馴，唔會主動攻擊人，所以喺片入面都冇攻擊去露營嘅一家人。異特龍就係侏羅紀時期嘅其中一種大型恐龍，身長近十尺，曾經稱霸侏羅紀。喺《侏羅紀世界》都有出場，導演解說就表示，今次嘅短片嘅異特龍仲大過喺電影見到嗰隻。
網上圖片
喺片尾彩蛋仲會見到，恐龍畀人放生之後就喺全球各地打橫行。所以就會見到不論海陸空都會見有恐龍，人類又變返做食物鏈最底層。
