點解評論會咁兩極？睇下唔鍾意《Joker小丑》嘅觀眾有咩意見
大家覺得套戲點？
托德菲臘斯(Todd Phillips) 導演嘅《Joker小丑》由贏左金獅獎到而家惹嚟熱話，而最值得留意嘅係，喺網站爛番茄(Rotten Tomatoes)嘅綜合媒體影評分數係68%，但係觀眾分數就係90%，評價兩極。咁今次一齊睇下點解有啲人會唔鍾意呢部戲。
1.《Joker小丑》冇參考原著
網上圖片
導演喺之前嘅訪問提過：「我地冇參考過任何原作嘅內容，咁一定會有班書迷會唔鍾意，但係我地想創作屬於自己嘅版本，重新再作過今次小丑嘅背景故事。」
就導演同編劇嘅目標嚟講，今次電影成功吸引冇睇過漫畫嘅觀眾入場，但係都有人認為如果電影係對原著漫畫冇興趣，咁點解仲要用Joker呢個角色去講故事？
2.Joker 動「殺機」原因片面
有啲觀眾就覺得Joker喺戲中只係因為個人嘅復仇慾望而展開殺戮，對於唔少fans嚟講，Joker係個足智多謀有遠見嘅犯罪天才，但係《Joker小丑》嘅殺人動機都只係源於報復嘅慾望。而佢之所以成功「煽惑暴動」，都只係因為基層市民仇富情緒爆煲，搞成件事片面兼單一。讀過世史嘅朋友都會知道，一件歷史事件背後唔會只係得一個原因，唔會「因為樓價太高，年輕人就上街」。
3. Arthur Fleck 角色塑造唔深入
網上圖片
華堅馮力士喺戲中表現無懈可擊，就算贏埋奧斯卡影帝都唔奇，但係有觀眾認為Arthur Fleck嘅人物塑造唔夠深入，例如佢同Thomas Wayne嘅關係就描繪得唔夠詳細，只係為左劇情而輕輕帶過。
4.太似馬田史高西斯嘅風格
網上圖片
導演托德菲臘斯講過呢部戲嘅靈感嚟自馬田史高西斯嘅《的士司機》同《喜劇之王》，希望可以用Joker同呢兩部經典之作互文對話，但亦都有人呢啲「致敬」搞到電影唔夠原創。
5.角色背叛原著
網上圖片
最大嘅批評位就係導演要Arthur Fleck有個悲情身世，等觀眾去「了解」佢，呢個設定原全破壞左小丑原本嘅吸引力，原著FANS覺得小丑就係純粹嘅邪惡，「無定向喪心病狂」先係小丑嘅最大嘅可怕之處，唔需要話咩畀社會壓逼到痴左線。
