謝拉力圖曾想阻止華堅做Joker？ 皆因《Joker小丑》唔係佢做主角？
勉強冇幸福架。
網上圖片
華堅馮力士（Joaquin Phoenix）主演嘅《JOKER小丑》（Joker）全球票房大收6億1,900萬美元，不過最近外國傳媒《The Hollywood Reporter》就大爆，喺《自殺特攻：超能暴隊》（Suicide Squad）飾演小丑嘅謝拉力圖（Jared Leto）曾經想阻止華堅馮力士做小丑，點解會咁呢?
網上圖片
謝拉力圖飾演嘅小丑劣評如潮，有人覺得係佢嘅戲份畀人剪走晒，搞到佢變左做閒角。不過就算《自殺特攻：超能暴隊》評價咁差，謝拉力圖仲係有興趣繼續做小丑。當佢知道華堅會做新一任小丑嘅時候，就算呢個版本唔係DC擴展宇宙（DCEU）都好但係佢都覺得好唔高興。《The Hollywood Reporter》報導指謝拉力圖知道華納兄弟畀導演揾華堅做主角嗰陣，佢覺得「沮喪同被疏遠」。
網上圖片
報導仲大爆謝拉力圖知道《JOKER小丑》開拍，唔單止淨係同經理人投訴，仲叫佢個音樂經理人Irving Azoff畀壓力華納兄弟，仲要求一定要阻止呢件事發生。Irving Azoff表示拒絕評呢件事。
網上圖片
謝拉力圖之所以會拍小丑嘅主因，係因為希望可以拍到小丑嘅獨立電影，但係當華納要拍《JOKER小丑》嘅時候就冇預到佢份，搞到人地嬲嬲豬。不過，有知情人士就踢爆，華納相當唔滿意謝拉力圖喺《自殺特攻：超能暴隊》嘅表現，可能係最後搞到小丑變成閒角嘅原因。
網上圖片
報導仲提到，謝拉力圖曾經同經理人應該要畀佢早啲知道華堅會成為小丑，咁樣佢就可以早啲求華納留返個角色畀佢。不過可惜一切都太遲，報導仲指華納唔會再畀謝拉力圖做小丑，《猛禽暴隊：解瘋小丑女》（Birds of Prey）唔會再有小丑出現。因為華堅唔喺DCEU入面，相信未來會有新小丑人選。而且謝拉力圖主演嘅《Morbius》，出年七月尾會喺美國上畫。
