【跑 · 動】吉爾吉斯挑戰賽2019
吉爾吉斯係中亞五國之一，處於多個文化交匯點.
今年七月中，小弟有機會同XTE Ultra協辦位於中亞細亞嘅吉爾吉斯挑戰賽，吉爾吉斯係中亞五國之一，東面接壤中國，北面則與哈薩克相接，因為地理位置，吉爾吉斯處於多個文化交匯點，如果你鍾意睇武俠小說，突厥、天山、西域等等嘅地區其實就係吉爾吉斯境內或附近。相傳詩人李白就係響吉爾吉斯入面嘅碎葉市出生架啦！
今次嘅比賽響吉爾吉斯第三大城市卡拉科爾起步，進入泰爾斯凱山脈（Terskey Alatau，屬於南天山山脈），經過景色壯麗的高山冰河湖阿拉湖，最後返起點衝線，三日嘅比賽全長大概80公里，路程雖然唔長不過需要爬升3500米，路線最高點更達3900米，所以都唔易應付。小弟會將成個比賽用遊記方式分上中下三集同大家分享，希望同大家嘅眼睛去一轉旅行！
Day 1 &2 首都 比什凱克
作為前蘇聯嘅一部份，吉爾吉斯到處都有俄羅斯文代嘅色彩，首都比什凱克到處都能見到前蘇聯嘅建築物，一輪舟車勞頓終於到達酒店已經係晚上七點幾，唔使諗嗱嗱臨落去搵嘢食，完全言語不通情況下點左三味好似幾好食嘅餸， 點知一個係凍冰冰肥到嘔嘅牛腸冷吃，另一個係本地出名嘅羊酥奶，唯一可以接受嘅係係油淋淋嘅羊肉湯麵，見到堆嘢食，我心入面即刻彈左一句「吉爾吉斯歡迎你」！
作為跑手嘅我，第二日一早起身就梗係即刻晨跑一轉！晨跑嘅好處係， 你可以完全感受到城市嘅生命力，熙來攘往嘅街道都係趕住返工嘅上班族，路邊往往有車仔檔又或者小店賣緊熱辣辣嘅本地早餐，用雙腳感受城市，個人認為係旅遊最佳節目！一早睇定地圖就出發，向着市內最大嘅乾濕貨市場奧什（Osh）進發！由酒店到市場大概6公里，沿途經過市政府等等嘅地標，好快就到左奧什。一路跑都見到好多大媽坐喺路邊買住兩種唔同嘅飲品，入去市場前本着乜都試嘅心情買咗杯嚟飲，大媽見我係遊客就介紹左我飲黑色嗰隻，入口好似酸梅湯，甜甜地幾啱跑完步飲，跟住佢好慷慨咁請咗我飲另一隻白色嘅，一入口完全係琴晚嗰啲羊酥奶味，仲要酸到一個點，忍唔住一口噴返出嚟，大媽唔單止冇介意仲指住我係咁卡卡卡卡咁笑，呢個仲唔係某官員所講嘅圈套？
入到市場， 真係嘆為觀止！有蓋市場大概有半個維園球場咁大，淨係賣香料已經有三四十檔，當地盛產蜂蜜，粗略估計市場總共賣緊過百隻唔同款嘅蜜糖，至於蔬菜同肉類更加係不計其數，有一檔牛肉直情係有標凖超級市場咁大，你數得出嘅部位都有！跑完肚餓嘅我梗係立刻搵嘢食，今次目標係聞到香睇到好食嘅街邊小店，沿着香味比我搵到好多檔熱辣辣新鮮燒嘅串燒，好食到幾乎連條都吞埋落肚！同琴晚嗰餐真係差天共地！食完買埋蜜糖就跑返洒店冲涼，然後下晝就開電腦飲住咖啡開工做嘢。係，呢啲就係所謂嘅slash life，你以為去旅行，其實電腦不離身一有wifi就開工。
下集待續.....
【作者簡介】
Norman
Run For Good 創辦人，退役運動員，前外展教練，現在是跑得慢唔夠快冇速度的跑手一名。
