【跑 · 動】吉爾吉斯挑戰賽2019 · 中卷

Norman @ UPower

上回提到,響吉爾吉斯嘅首都比什凱克遊覽完就繼續工作,咁之後又發生咗啲咩事呢?我哋即刻去片睇吓!

Day 3-4

工作一輪之後,風塵滾滾地趕過去比賽嘅起點-卡拉科爾。由比什凱克(Bishkek)去卡拉科爾有兩個辦法,有錢嘅可以自己包部的士,舒舒服服咁話去就去話停就停,快嘅三個零鐘慢嘅玩足一日就可以去到卡拉科爾(Karakol),冇錢嘅就要去到市內嘅巴士總站,好似香港搭泥鯭的咁坐部廿八座小巴,如果你好彩最尾一個上車就即走,唔好彩第一個上車嘅分分鐘等足三個鐘先有得走。咁我呢啲貧窮跑手就梗係㨂後者慢慢等,唔知幸運定不幸,我係最尾一個上車,不過成架車唯一一個位置,左右都有一位大概200磅嘅朋友坐喺度,我成程就好似巨無霸入面塊生菜咁樣樣夾足三個鐘,我落車嘅時候成身汗(仲要唔知係我嘅汗定人哋嘅汗),心入面暗暗咁發誓:「返去果程老虎蟹都要自己包部的士!」最後回程包的士返去又的而且確有驚喜喎。(記得留意下集)

卡拉科爾係吉爾吉斯第三大城市,唔好誤會,話就話第三大, 其實人口都只係75,000人左右,一個深水埗都已經多人過佢。但係唔好睇小呢個城市,由於冬天係滑雪勝地,都有唔少嘅酒店或者旅舍,好多都仲要係家庭式經營,麻雀雖小五藏俱全,乾淨企理得來仲好有人情味,嘢食方面由於比較多遊客,所以有返少少正常啲嘅西餐,咁當然如果重口味嘅你堅持要食油淋淋肥腸(詳情請看上集)咁周圍都會有。我去到就即刻食咗一個超級正嘅串燒,加杯啤酒,坐享白雪雪外牆嘅酒店門口,望住出面沙塵滾滾有一望無際嘅馬路,好有作家三毛「撒哈拉的故事」嘅感覺!

第二朝起身當然少不了晨跑一段,卡拉科爾面積其實唔大,大概同天水圍差不多,圍住跑一圈二十公里咁上下,儘管係旅遊熱點,不過唔好忘記, 吉爾吉斯嘅旅遊業唔算發達,大部份嚟呢度嘅遊客都係冬天到達,之後就去附近嘅滑雪場滑雪,所以同其他國家嘅旅遊熱點唔同, 呢度唔算多嘢睇多嘢買, 不過民風就好純樸,每個見到你嘅當地人都會友善咁打招呼,就連啲狗狗都好友善, 點摸點玩都唔怕,啲小朋友甚至會踩單車嚟跟住你跑一段,佢哋會用本地話加一個熱誠嘅笑容不斷同你講嘢, 我估內容大概係加油努力你係邊個響邊度來做乜嘢喺度跑步等等等等......不過去親旅行都鍾意晨跑嘅我感覺就非常新鮮!平時晨早流流出去跑步你見到所有人都忙於返工,人與人嘅實際距離好近,不過心與心嘅距離就好似係無限遠咁,响呢度雖然言語不通,你反而感受到人與人之間嘅親切感覺。

市內唯一嘅景點就係一個全木造嘅東正教教堂同埋好細嘅清真寺,老老實實,鍾意煮嘢食嘅我就比較鍾意行市內唯一街市, 當然冇首都個市場咁大,但係你完全可以感受到當地人嘅生命力同埋佢哋嘅飲食習慣,啲香料多到我直情想成個街市搬返屋企,街市仲有一啲當地好出名嘅kebab,即係一大舊肉串住喺個火爐度係咁轉住嚟燒,廚師會不斷將最外層燒焦左嗰啲肉切落嚟,跟住放落個薄餅度加少少醬汁包住比你食。呢樣源自中東嘅嘢食,響東歐,中亞,南亞等等嘅地方都好普遍,唔知係跑完肚餓定佢真係好好食,第一啖咬落去啲肉汁加埋燒烤嘅味道, 仲有特製醬汁加埋酥軟嘅薄餅,用蔡瀾嘅口頭禪,「不羡仙」。

響街市食完,順手買定往後比賽嘅糧水就返酒店繼續工作....

Day 5-6

呢兩日主要係預備個比賽, 大部份時間係set路標,即係將絲帶掛喺比賽路線上面,方便跑手識別,路線方面我就會喺下集同大家再分享多少少。而呢兩日賽手陸陸續續抵達卡拉科爾, 好多都係香港唔同比賽見過嘅跑手同工作人員,咁多日冇講過廣東話嘅我(事實上冇乜講過野, 因為當地人其實連英文都唔識)就梗係把握機會傾返夠本啦!

下集見!

【作者簡介】

Norman

Run For Good 創辦人,退役運動員,前外展教練,現在是跑得慢唔夠快冇速度的跑手一名。

Tagged:

Facebook Conversations