【跑 · 動】吉爾吉斯挑戰賽2019 • 下卷二
隔左咁耐，賽事去到尾聲，最後一日路段如何？比完賽又有咩花絮？既然疫症嚴峻大家冇得出街，不如大家睇吓文字描述過吓癮先啦！
Day 8 - 比賽第三天
浸完溫泉騎完馬，第三日起步大家都精神抖擻，不過可能精神得滯，頭一公里左右，前列跑手都睇漏左個路口一下就跑左上山，搞到主車群嘅賽手一路就跟住佢哋跑錯路，反而後面嘅賽手施施然去到路口就沿著路標慢慢落山，掃尾嘅工作人員以為大家已經順利過渡就將路標收起，到主車群嘅賽手發覺唔對路要返落山所有路標已經被收起晒。好彩前晚大會已經將路線簡單描述左比所有賽手聽，賽手憑着記憶慢慢都去到第一個檢查站。大家補完水定完驚之後就繼續出發。
之後嘅路段係一個極大嘅草原，雖然景色非常壯觀，但響同一景觀下跑十多公里的感覺絕對會使人發瘋！第二檢查站在草原正中心的位置，好多賽手到達時都忍唔住爆粗咒罵行唔完嘅草地！比賽最後10公里需翻過過一個大概300米的山脊，上山時沒有明顯山徑，考驗賽手選擇適當路線嘅能力。而在山脊頂點就可以望返三日以來行過嘅所有道路以及終點卡拉科爾。不過賽手們都歸心似箭，大部份都一鼓作氣跑埋最後5公里嘅下坡路。比賽嘅終點設於酒店入口，好多賽手沖咗線都唔捨得即刻返房，寧願留低等埋其他賽手衝線，一齊分享沖線嘅喜悅！就算係前列跑手一早沖咗線，佢哋返咗房沖完涼之後都會落返嚟等其他較慢嘅賽手衝線。長途嘅超級馬拉松比賽就係咁，即使短短幾日，賽手之間都已經建立左緊密嘅友誼，由三天前起點線上嘅陌路人變成三天後響終點線互相擁抱嘅親密戰友，呢啲都唔係一般跑步比賽有嘅體驗。
賽事頒獎典禮於即晚晚膳時舉行，除咗恭賀贏出嘅賽手，大家都好熱烈咁影相留念，互相祝賀對方完成三日嘅挑戰！
Day 9 - 回到比什凱克
如果大家仲記得，小編去程嘅時候係搭又冇冷氣又迫嘅公共小巴去到比賽城市卡拉科爾，好彩返去大會就安排左包車，我哋一行六七人坐一架小巴，比起之前真係不可同日而語！重點係，我哋可以話停就停，話走就走，由於回程會經過全世界第二大嘅高山湖-伊塞克湖（Issyk-Kul)，我哋特登叫個司機搵一個靚沙灘俾我哋游下水，司機亦不負眾望，停咗係一個大嶼山長沙咁上下大嘅沙灘俾我哋慢慢游，成個沙灘仲要廿個人都冇，勁正！作為全世界第二大嘅高山湖，伊塞克湖面積大過整個香港，水清見底，湖水微鹹，蘇聯時期呢度係著名嘅療養勝地，所以附近有好多桑拿浴室同埋別墅，據稱由於伊塞克湖地勢獨特，蘇聯軍方曾經一度用作魚雷試驗場！我響個湖度一邊游水，一邊曬太陽，一邊咀嚼吉爾吉斯嘅歷史，一邊欣賞秀麗景色，再回味過去幾日嘅旅程，用蔡瀾嘅一句口頭禪，「不羨仙」。
感謝大家欣賞，吉爾吉斯挑戰賽嘅分享告一段落，下期《跑·動》再同大家分享其他跑步嘅點點滴滴！
