KD韋少明星賽破冰？西岸球星齊起哄
NBA全明星週末，重頭戲必然係東西岸對決，除了比賽分數外，最多人留意一定係近期話題不斷的杜蘭特及韋斯卜克，兩人傳鬧不和，但又同為西岸隊隊員，究竟要點合作呢？
AP圖片
第一節，東岸以31:26領先時，觀眾最期待的畫面出現了﹗「KD」同埋「韋少」齊齊跑快攻，「韋少」見到「KD」切入禁區，立即做個「one two」，傳球俾「KD」之後衝入禁區，「KD」亦好識做回傳，與「韋少」嚟個「拆你屋」。
AP圖片
入波之後，「韋少」亦無好似之前常規賽對住KD咁「起晒弶」，舉舉手向「KD」講聲好波，不過「KD」就好似無留意到「韋少」，立即回場防守。
AP圖片
相信佢兩個嘅事全聯盟都好清楚，而最好笑嘅係，成隊西岸球星見到佢地嗰球「拆你屋」，到比賽暫停時紛紛起哄食花生，為佢地歡呼、慶祝兩人破冰，但「KD」同「韋少」都係尷尷尬尬咁，坐喺到休息又唔係，企係到傾計又唔係。
（P.S. 仲有一樣野比較少人留意，但刺迷一定睇到，就係出名無表情嘅李安納，喺慶祝「KD」同「韋少」破冰嗰時，竟然有好開心咁笑！！！！）
