【跑 · 動】橫渡日本320公里之旅 · 卷二

GGWP @ UPower

拖拖拉拉又去到第二集,希望去到第七集疫情亦會去到尾聲,大家可以開開心心以真面目相見。

上回題到,響築地市場食完早餐就出發,首先經過銀座一帶,由於時間尚早,比起平時熙來攘往嘅街頭,寧靜嘅銀座就好似星期日清晨嘅中環一樣,有另外一種嘅清新感覺。好快就去到皇宮外苑,我相信一般香港人去旅行都比較少會去呢個地方,呢個前身為呢個前身為江戶城嘅日本天皇居所其實好靚,我沿住條護城河跑左一段,遙遠望入去,入面嘅格局有氣派之餘又有一份日本人嘅寧靜致遠。經過皇宮之後就係一啲住宅區域,開始見到學生同埋上班一族趕返工返學,見到佢哋咁趕,我嘅步伐都不期然加快左。

響城市入面跑有個好處,就係去到邊度都有補給。大約十零公里左右我就開始肚餓,一路跑一路搵餐廳,隨手就揀咗一間咖啡奶茶任飲嘅快餐店,補充水份時都順手補充番啲咖啡因提吓神。

再起步,慢慢已經遠離東京市區,第一晚嘅目的地係響一個叫桶川嘅地方,前一晚上機之前響機場求其搵咗一間Airbnb,見距離起點大約40公里左右,應該點都跑得到,價錢又平,盛惠港幣$102 (係,一舊水,應該係我人生中最平嘅Airbnb),仲要係單幢別墅嘅2樓全層,一路跑去嘅時候都擔心唔知會唔會係網上騙案,邊有理由平到咁?不過唔緊要,一個麻甩佬至多訓一晚火車站,抱住Nothing to lose嘅心態繼續上路。

接近是日終點,經過一個叫做經過一個叫做上尾嘅小城,竟然好好彩地經過一個好大嘅海鮮市場,入面嘅刺身仲平過築地,已經跑左三十幾K嘅我當然快快手買返幾盒,不過問題係市場入面冇位置坐低食,唯有空中加油一路行一路食。唔知係肚餓定其他原因,啲壽司同刺身真係好食到一個點,比我響香港嘅食過最貴嘅日本餐廳好食得多!

最後終於到達桶川,響google map大神協助下順利到達旅舍。見到旅舍,真係有驚喜,簡潔雅緻,窗几明淨,設備齊全,雖然入面冇床,不過訓塌塌米又係另一種體驗。由於旅程要非常輕便,所以只能帶一套休息用衫褲,而身上嘅運動衫就需要每日清洗,仲要希望即晚乾透。所以稍事休息之後就即刻用旅舍附設嘅洗衣機洗埋衫順便浸個浴,旅舍附近仲有大型超市,入去行吓食下,再買支細清洒返旅舍淺嚐,回味一下整日嘅旅程。諗返轉頭,一整日嘅洗費連住宿只係港幣二百蚊左右,真係講都冇人信。

Tagged:

Facebook Conversations