【跑 · 動】橫渡日本320公里之旅 · 卷三

GGWP @ UPower

疫情第四波爆發,冇運動場冇晚間堂食繼續冇旅行就不如眼睛去住旅行睇住第三集先啦!

上回提到,由東京出發到達桶川,大約46K,仲轉左一個$200嘅民宿二樓全層。好彩天氣乾爽,前一晚洗好嘅跑衫第二日已經乾晒,可以乾乾淨淨咁起步,以琴日嘅速度今日應該可以跑多幾K,所以琴晚瞓覺前已經book定酒店,是日大概要跑52K,有得瞓叫做個心都定啲(當然前提係要跑到去先!)

一起身首先跑一兩公里去食返個一風堂拉麵早餐先!唔好誤會,喺便利店入面買到嘅一風堂杯麵,其實跑到第二日,便利店係補水補糧嘅重要地方,日本嘅便利店亦都好齊全,基本上有位置俾你堂食埋先走,而且仲有好好食嘅天婦羅同炸物,每一次入到去,炸豬扒同雞扒都係我嘅至愛。仲要每一次都會喺便利店去埋洗手間屙乾屙淨先跑,日本就有呢個好處,基本上所有洗手間都乾淨過你屋企嗰個,等你去得好安心。

飲飽食飽就正式起步,基本上第二日嘅路線絕大部份都係跟住國道17號,由於開始離開城市,農田嘅比例相當高,而且好多時見到住宅後面都會自己仲下花花草草甚至有菜田,一路跑一路有藍天白雲同綠油油嘅農田田襯托,所以跑步真係可以帶嚟唔一樣嘅體會,呢啲感受,你真係要自己跑一次先至可以體會到。

去到大概20公里左右就能到達一個比較大嘅城市-熊谷市。呢個城市規模大約好似元朗市中心咁上下,當然冇咁多高樓大廈同冇咁多人,不過就好多民生設施同食肆,臨入城之前仲經過一個好大嘅幼稚園,目測大約有維園中央球場咁上下大左右,除咗好靚嘅花花草草之外,入面仲有小型運動場,小朋友可以有好多空間去享受校園生活,見到啲小朋友響入面跑來跑去,真係好羨慕佢哋可以有咁大個地方上堂。

入到城當然即刻搵嘢食,作為麵痴嘅我即刻搵到一間香港都有分店嘅拉麵店,用朝聖嘅心態入去食咗一碗好平嘅拉麵同天婦羅,可以話有驚喜有失望,驚喜係原來日本人對質素監控非常嚴謹,味道同香港真係一模一樣,失望亦都係因為嘥咗個quota,早知返香港食算數⋯⋯

食完之後就繼續上路,離開態谷市之後就開始進入比較荒蕪嘅日本中部,頭先覺得好舒服嘅田原景色開始不斷重複,又進入全日最熱嘅中午時間,而且方圓百里都冇便利店或者汽水機,呢十幾K開始慢慢咀咒田園嘅荒蕪同不斷重複嘅景緻。好彩響臨缺水前一刻去到一個高速公路旁嘅油站,可以慢慢休息吓同飲吓水,個油站仲有一棵好靚嘅心形樹,忍唔住手係咁同棵樹瘋狂打卡。過完個油站之後天氣開始涼返啲,而且景觀開始有所不同,因為我見到整條路程當中最重要嘅河流-利根川。作為日本第二大嘅河流,利根川全長322公里,由群馬縣(係,冇錯,五連髮夾彎嗰個群馬縣,之後會經過,往後幾篇會介紹返)嘅群山起源,一路到首都東京都,亦係首都圈嘅食水重要來源,我嘅路線基本上都係沿利根川上行。作為日本第二大河流,利根川嘅氣勢亦相當磅礡,淨係跑條橋過河都接近1公里,不過呢度算係河嘅中下游,明顯見到有好多河道改善工程,所以上游嘅風景應該會截然不同。

最後10公里,沿着利根川嘅支流跑,鍾意釣魚嘅我一路望一路嘩嘩聲,除咗因為好多大魚游來游去,魚嘅種類仲要相當多,我認得加唔認得嘅加埋起碼有幾十種,難得嘅係,附近都冇乜人釣魚,同樣情況響香港,我諗乜魚都會俾人釣乾釣浄。一路睇一路跑,好快就就到達是日目的地-伊勢崎。琴晚搵酒店只係求其搵咗日本好多城市都有嘅東橫inn,冇咩期望底下有反而有驚喜喎,因為佢俾咗高層房間,上到樓就立刻見到一個無敵嘅靚日落,乘機開杯清酒,一面拉筋,一面欣賞呢一個咁靚嘅日落先至慢慢沖涼搵嘢食,再回味返成日嘅旅程,心入面諗,呢啲moment真係學著名講波佬黃興桂話齋,‘有今生冇來世’!

未完待續.....

Tagged:

Facebook Conversations