網民難忍小童免費搭車佔座瞓覺 影相分享公審反被斥無愛心
凡事要完全讓所有人都滿意，都唔係咁容易~
專營巴士公司免收4歲以下小童車資，有網民近日卻在社交網站發文，指自己每日早上乘搭機場巴士時，均遇到一名家長帶著外傭與一對不足4歲的小朋友，不滿兩位小朋友未有支付車資但卻佔用座位。該網民更拍下照片欲進行網絡公審。
網上圖片
該網民在社交網站Facebook群組「生仔要考牌系列」發文，指自己每日早上乘搭A33巴士，由屯門前往機場，而每日早上都會遇到同一名母親帶著外傭，以及一對不足4歲的小朋友，兩名小童「全程各自當床咁瞓晒係座位，日日如是」。
該網民續說，「假如不是繁忙時間，或者路程唔係令到我哋付費乘客企咁耐，可能會容忍的......另外，往往落車前又將原本一大袋放地上之上學用品放到座位上『除塵』，如果下位著白褲坐落去，就真係多得你唔少......」他又建議，家長如果不想小朋友辛苦，可以考慮不要去如此遠的托管，又或者自己開車接送，「點瞓都得，唔好夾硬要其他人去包容那些不正確行為」。
網上圖片
不過其言論未獲其他網民的支持，反被批評無愛心，「樓主真係要多謝你屋企人，你細個時搭巴士抱足你全程，定係你一個豆釘自己企足全程？」、「瞓覺又投訴，喊又投訴，大叫又投訴，總之生仔係原罪」、「咁你咁需要坐咪搭的士，巴士係咁啦！」、「好多國家6歲才要俾車資，咁要抱住佢？」、「樓主石頭爆出嚟就係成人，冇血冇肉冇同理心冇愛心冇人性」。
另外，有家長留言分享自己經歷，「你又知個小朋友一定無俾錢？我仔未夠3歲為咗坐得舒服啲，我都已經買張八達通俾佢拍卡俾錢，坐小巴一定會同個司機講小朋友俾錢佔一個位」。
