爸爸愛健身 當兩個仔女啞鈴舉
外國一位爸爸是「舉鐵」愛好者，但屋企苦無工具，又只係得兩個仔女的時候，點樣先可以繼續keep fit？
（AP影片截圖）
答案好簡單，就係兩個仔女變晒做「鐵」，兩個小朋友cosplay啞鈴及鐵槓，俾老竇不停舉高舉低，滿足爸爸舉鐵的慾望。32歲的爸爸布朗是位健身教練，更表示6歲的仔仔及3歲的女女是最完美的負重物，因為隨着他們的年齡上升，負重亦增加，有助鍛鍊身體。
（AP影片截圖）
由影片可見，布朗展示不同的訓練動作，有深蹲、硬舉及肩推舉等等。雖然仔女只作負重物，但由他們面上的表情，亦可知道他們都樂在其中，心甘情願地被爸爸舉啊舉、舉啊舉，享受輕微的離心力。
（AP影片截圖）
除了可以享受家庭樂，爸爸亦指出做父親後的艱辛：「家長為了每日的生活，難以抽出空餘時間，但有了這種方式後，其實keep fit亦可以好方便，亦十分簡單。」唔知各位港爸，又有無興趣同仔女齊齊健身練大隻？
