《詭娃安娜貝爾3》最新預告 連華倫夫婦親生女都驚詭娃

Leng Zai @ UPower

啲惡鬼永遠都只會欺負啲無辜嘅人,今次連小朋友都唔放過。

網上圖片

《詭娃安娜貝爾》系列由温子仁監製,今集《詭娃安娜貝爾:回家》由呢系列嘅編劇Gary Dauberman擔任導演,《回家》仲有唔夠一個月就正式上畫。由預告可以睇到,華倫夫婦個女 Judy Spera佔左相當重嘅戲份,但喺現實生活入面,Judy有冇試過撞鬼呢?佢又點睇自己嘅父母呢?


網上圖片

最近因為《回家》就嚟上畫, Judy Spera 就接受左外國傳媒《Bloody Disgusting》訪問,講返關於呢隻安娜貝爾嘅故事。佢認為呢隻公仔的確會令人覺得好奇,佢父母都將安娜貝爾放喺玻璃樻入面,但有時佢隻手腳都會無故咁郁。Judy仲話安娜貝爾睇落係好得意嘅公仔,但其實唔係咁。

網上圖片

喺訪問入面,Judy話佢雖然好多冇見到安娜貝爾,但仲係覺得佢非常可怕。就連Judy個老公都話安娜貝爾係華倫夫婦博物館入面最邪惡嘅收藏。不過華倫夫婦有獨到秘訣去對付呢隻邪惡公仔,佢地同Judy講唔好直視安娜貝爾,同埋唔好承認佢存在。不過,兩位主演Patrick Wilson同Vera Farmiga都話同 Judy Spera傾偈嘅時候都覺得佢仍然畀安娜貝爾影響住,仍然係帶有恐懼,睇嚟呢隻公仔相當之得人驚。

網上圖片

導演Gary Dauberman表示,《詭娃安娜貝爾:回家》雖然整體故事係虛構,但喺戲入面有幾段華倫夫婦遇到嘅驚險情節都係佢地嘅親身經歷。呢個都係《詭屋驚凶實錄》系列嘅慣常做法。

網上圖片

《詭娃安娜貝爾:回家》將會喺七月四日上畫。

 

Facebook Conversations