• U生活

梁朝偉主演《獵狐行動》 公安跨境執法捉「逃犯」曾惹國際爭議

2019年06月19日 03:32 pm

Leng Zai @ UPower

中國公安跨境全球執法，相信香港人都非常熟悉。仲要由香港演員梁朝偉做主角飾演「經濟罪犯」，真係相當貼題。

最近外國媒體《Variety》報導，梁朝偉將會主演中國電影《獵狐行動》（Fox Hunt）。電影改編真人真事，由《給野獸獻花》、《機器之血》嘅導演張立嘉執導。中國政府由2014年開始行動「獵狐行動」，派出多個公安特工喺全球各個未簽署引渡條約嘅國家緝捕逃犯，兼強行遣返到中國受審。由中國公安成立「獵狐行動」專項小組，主要負責跨境執法，拘捕被列入為國際刑警嘅「紅色通報」名單嘅疑犯。而《獵狐行動》就係改編呢個全球跨境，由強力部門執法嘅行動。

「獵狐行動」係由中華人民共和國公安部部署執行，專門搜捕逃亡到境外（包括香港、澳門）嘅罪犯。主要係為左拘捕受到貪污指控，而逃亡到境外嘅中國疑犯。「獵狐」顧名思義即係要捕獵狐狸，中國公安將貪官比喻成蠱惑嘅狐狸。

根據中國公安部副總警監孟慶豐表示，由2014年開始，「獵狐行動」己經喺超過120個國家和地區（包括香港），拘捕左4300個涉嫌貪腐嘅逃犯，搜捕超過170億人民幣嘅非法資金。類似美國、加拿大、澳洲呢啲冇同中國簽署引渡條約嘅國家都係逃犯嘅首選逃亡地點。

不過， 「獵狐行動」經常令外國政府不滿，例如美國政府曾發聲明，指中國公安喺當地執法之前一定要事先通知，甚至警告中國停止喺美國執行「獵狐行動」。