• U生活

MCU亞裔超級英雄片《上氣》選角有佢？ 「宇宙最強」武打巨星將加入

2019年06月19日 07:28 pm

Leng Zai @ UPower

宇宙最強都已經55歲，做主角老豆就差唔多喇。

舊年傳出Marvel已經開始籌備MCU嘅第四階段，仲打算食住《黑豹》個勢開拍第一部亞裔超級英雄電影《上氣》（Shang-Chi），近日有唔同嘅外國媒體傳出指宇宙最強嘅甄子丹可能會演出其中一個重要角色。

話晒甄子丹都已經一把年紀，就梗係唔會做主角啦，好多人都估佢可能會飾演主角上氣個老豆傅滿洲（Dr.Fu Manchu）。傅滿洲喺漫畫入面設定為中國第一反派，佢仲博學多才，識晒世上所有科學知識，而且仲相當之好打，兼有邪惡野心。

「上氣」呢個角色喺1973年第一次喺Marvel漫畫亮相，佢喺湖南出世，自細就與世隔絕，畀老豆傳滿洲訓練成武術大師。喺某次執行暗殺任務，上氣發現原來佢老豆傅滿洲原來係相當邪惡，決定大義滅親，對抗老豆，後來加入左復仇者聯盟。

而「上氣」嘅演員人選，外界就盛傳林路迪（Ludi Lin）係Marvel Studio啱心水嘅人選，佢曾經喺《水行俠》做過莫克（Murk）。林路迪係加拿大藉亞裔，喺中國福州出世，喺澳洲成長，後來就移民去加拿大。普遍影迷都覺得林路迪去演上氣冇問題，大家都覺得佢靚仔又大隻，相當適合做上氣。

亦都有人認為上氣嘅原型係出自李小龍，所以另有一批影迷覺得Mike Moh都幾適合做上氣，因為佢喺昆頓塔天奴嘅新《從前，有個荷里活》入面扮李小龍。

仲有曾經演出過《沙贊！神力集結》嘅星加坡演員Ross Butler都係飾演上氣嘅其中一個人選。