【掃毒2】華仔近年必睇五大代表作
唔好一味話人填海，點都要欣賞下天王落力演出嘅佳作先得架嘛。
網上圖片
《掃毒2》喺中國票房直逼十億人民幣，睇嚟中國觀眾相當鍾意港產式雙雄片，嚟緊《掃毒2》即將喺香港上畫，未知到時呢部電影回歸香港嘅成績點呢？呢次想同大家分享一下我地嘅劉天王近呢幾年嘅「代表作」，基本上每一部都有極大迴響，部部令人又愛又恨，大家睇《掃毒2》之前可以重温返呢幾部電影，到入場嘅時候會有更大樂趣。
1.《未來警察》
網上圖片
《未來警察》入面，劉天王一身嘅造型基本上係同「NOD32」防毒軟件嘅吉祥物係一樣，喺戲中仲會同飾演大閘蟹反派嘅樊少皇大戰三百回合，淨係睇呢部戲嘅CG同埋人物造型都值回票價。而且，《未來警察》嘅劇情基本上係同九三年嘅《超級學校霸王》差唔多，又係講一班殺手時空穿梭到以前暗殺一個重要人物，然後劉天王就要返去保護嗰位重要人物。導演知道香港成日掛住以前，所以專登寫個一模一樣嘅劇本等大家回憶一下昔日風光。
2.《風暴》
網上圖片
《風暴》又係香港電影人最擅長嘅警匪片，成部電影最大賣點就怒炸中環，實現左唔少香港人嘅願望。不過成部戲最精彩嘅地方就係，成個中環都炸到天崩地裂，劉天王仍然都咁瀟灑，唔單止少少損傷都冇，連個髮型都冇亂過，睇嚟劉天王用開嘅Hair Gel質素相當唔錯。同埋，《風暴》最有深度嘅地方就係個名同部戲其實冇咩關係，真係估佢唔到。
3.《拆彈專家》
網上圖片
劉天王化身無畏無懼，天生就為香港市民犧牲自己嘅拆彈專家，成部戲最精彩嘅場口就係劉天王雖然拆彈專家，但都有佢拆唔掂炸彈。扮演普通軍裝警嘅蔡瀚億，身上畀反派裝左一個炸彈，但劉天王趕唔拆，於是佢就同蔡瀚億講：「你係差人，你有你嘅責任遠離人群，唔好靠近啲車，企喺原地，咁樣嘅傷亡係最少」劉天王講完對白之後就即轉身極速用行動示範點樣遠離人群，之後綁喺蔡瀚億身上嘅炸彈就爆炸，即時化灰。及時遠離人群嘅劉天王當然因為走得快而冇事。
4.《俠盜聯盟》
網上圖片
有法國巨星尚連奴加盟嘅《俠盜聯盟》，因為有荷李活巨星參演嘅緣故，所以就連當中嘅故事、人物造型、動作場口都同荷李活大片一樣。基本上喺《職業特工隊》第一集見過嘅元素，喺《俠盜聯盟》入面都會見到，果然香港電影人都好清楚觀眾嘅懷舊情緒。
5.《天機：富春山居圖》
相信唔少人都《天機》幾咁精彩，可謂幕幕經典，呢部電影根本完全突破劇情嘅框架，為觀眾帶前所未有嘅娛樂。例如戲中有林志玲姐姐剃光頭扮尼姑，精彩程度拍得住《少林足球》趙薇；喺一個普普通通博物館入面，竟然會見到女鬼，超越左片種嘅界限。仲有最精彩嘅就結尾，劉天王同反派佟大為嘅劍擊對決，兩個演員最後嘅對決要專登戴返個劍擊用嘅面罩，移形換影咁格劍三百回合，精神少啲都睇唔到佢地點打法。
網上圖片
如果你係志玲姐姐嘅FANS就有福了，因為志玲姐姐喺《天機》換左無數個造型，包括先前所講嘅尼姑，仲有：護士、空姐、特工、殺手、大肚婆、未亡人、誘人睡衣等等。基本上淨係睇志玲玲姐姐換衫都夠，更何況仲有劉天王成部戲都大顯神威，為國寶「富春山居圖」不惜同鬼佬、日本仔、同埋漢奸搏鬥，最後終於成功以香港警察嘅身分成功報國。
