【Marvel《上氣》】正義仔打邪惡老竇大義滅親 「滿大人」與主角「上氣」嘅前世今生
會唔會打到，上氣……唔接下氣。
網上圖片
早前Marvel喺美國聖地牙哥嘅Comic-Con公布左梁朝偉演《上氣》嘅反派傅滿洲「滿大人」，咁今次就呢個機會講下「滿大人」同「上氣」呢兩個角色嘅歷史背景。
網上圖片
傅滿洲呢個角色嘅原型係嚟自一九七二年嘅美劇《功夫》（原名叫《勇士》，故事由李小龍原創，原定都係由李小龍主演，但華納兄弟臨門一腳抽起李小龍，改劇名之餘仲換成大衛卡拉甸做男主角），當年Marvel就想向華納買起呢套劇嘅漫畫版權，但最後受拒。（DC嘅持人就係華納）
網上圖片
之後Marvel就轉買英國作家Sax Rohmer《傅滿洲》系列嘅小說版權，呢一系列嘅故事曾經畀唔少荷李活公司改編成唔同嘅電影。
網上圖片
喺Rohmer嘅小說入面形容傅滿洲係一個又高又瘦、兩條眉毛豎起、下巴留左一執鬚、個樣同魔鬼一樣、着住清朝官服嘅邪惡博士。佢帶領住一個叫Si-Fan嘅秘密組織，無惡不作。
網上圖片
喺一九八三年，Marvel持有傅滿洲嘅版權到期，喺之後嘅漫畫入面，如果要再提及到「傅滿洲」呢個角色嘅名，就一定要用化名，或者唔好提佢真名。喺漫畫後期都係叫佢做「父親」、「佢老豆」、「上氣個老豆」嚟稱呼傅滿洲。
網上圖片
喺二零一零嘅《Secret Avengers》入面就解決左呢個問題，漫畫情節提到「影子議會」復活左傅滿洲。佢地發現左原來「傅滿洲」只係化名，佢真名原來叫「鄭祖」。同時呢位「鄭祖」以前係發左長生不老術嘅中國術士。
網上圖片
喺Marvel買左傅滿州嘅改編權之後仲創作多個角色「上氣」，佢係傅滿州未公開過露面嘅仔，當時Marvel就照抄李小龍嘅形象嚟創作上氣。喺一九七三年，上氣第一次登場。其實上氣經常都會出現喺其他嘅漫畫作品，例如《變種特攻》、《蜘蛛俠》。喺漫畫有情節講到蜘蛛俠冇左「第六感」，最後係由上氣教佢功夫。
網上圖片
上氣係Marvek漫畫入面，喺冇超能力嘅角色之中，係有最強功夫水平嘅人物。佢可以避到子彈，用護腕仲可以擋埋子彈。佢擅長用劍、棍、雙截棍、手裡劍、菲律賓短棍等等。上氣嘅「氣」（Chi）極為犀利，可以用「氣」去感受鳳凰隱藏左嘅超能力。
網上圖片
上氣由傅滿洲撫養成人，當佢發現左老豆原來係咁邪惡嘅時候就決定要大義滅親。最後終於成功阻止左傅滿州征服世界。之後上氣退出左自己創立嘅英國間諜組織，返去中國做漁夫。
網上圖片
不過正如先前曾經提到，傅滿州其實冇死到，佢之後再次復活，再畀人打敗死多次。
網上圖片
喺八十年代嘅時候，Stan Lee有計劃請李小龍個仔李國豪去飾演上氣，因為始終呢個角色係照抄李小龍嘅形象。而李國豪喺一九九三年拍攝電影《烏鴉》嘅時候，因為道具槍出「意外」而中彈過生。
