三部港產黑幫電影 劈友劈到入商場 鬧市過百人馬亂咁劈
藝術源於現實，港產片都唔例外……
網上圖片
最近港產黑幫片嘅情節成為現實，今次就分享一下三部劈友劈到開巷嘅香港黑幫片，而家睇返以前嘅港產片簡直就好似預言書一樣。（可能其中一主因係以前嘅社團都鍾意投資拍黑幫片，所以令到港產片異常寫實。）
1.《尖東梟雄》
《尖東梟雄》喺1985年由邵氏出品嘅B級動作片，由邵氏小生王龍威自編自導自演，徐少強同梁家仁主演。故事講述社團新任話事人（張權飾）諗住喺尖東插旗，但係原本嘅尖東話事人（石堅飾）就唔想畀人分地盤。所以張權買通爛雞賜（沈威飾）出賣對方殺大佬石堅。爛雞賜就掉轉槍頭，殺死石堅全家，連小朋友都唔放過。
花仔龍（徐少強飾）同癲狗威（梁家仁飾）為左肅清門戶，就做警察嘅好兄弟咩渣文（王龍威飾），一齊去新界魚排執行家法，一人一刀插死沈威。之後三兄弟（兩個黑社會，一個差人）為左幫石堅報仇兼救埋梁家仁個女，每人帶住一把刀殺入尖東商場同張權嘅手下浴血商場，最後由梁家仁了結仇家。
成部戲最緊要嘅場面就係最後十分鐘嘅商場大劈友，三兄弟一路由地下殺到上樓，一班龍虎武師係咁畀人掟落街，相當搏命。其中王龍威斬甩保安隻手，轉到樓梯入面徐少強仲將敵人個頭撼穿牆角，相當血腥。
網上圖片
2.《血洗洪花亭》
網上圖片
《血洗洪花亭》喺1990年上畫，由點五步攝影柯星沛執導，劇情講述王祖賢為社團「全興社」話事人個女，佢就同做緊警察嘅林俊賢拍拖，但因為兩個人嘅身分問題所以成日嗌交。而林俊賢嘅好朋友莫少聰就唔覺意愛上左王祖賢，所以一時間陷入三角錯愛嘅關係。王祖賢老豆因為有太多犯法生意而被判入獄，王祖賢焗住接任成為社團新話事人。而王祖賢上位之後就想將社團犯法生意摺埋，但係令到一班叔父相當不滿，尤其係佢老豆嘅手下龍方。龍方乘機強姦王祖賢，拍埋片之餘兼要脅殺死佢老豆，之後龍方就一直不停咁凌辱王祖賢，仲為左上位仲同佢結埋婚。王祖賢最一直忍辱負重，最後用計聯合林俊賢搗破龍方走私生意，最後王祖賢成功手刃仇人，殺死龍方。
其中《血洗洪花亭》最屈機嘅一幕就係龍方派得力手下大軍帶隊劈友殺人，大軍帶過百名刀手，手纏紅巾，由餐廳開始殺起，專殺西裝友，唔理食客定黑社會，一律殺無赦！就算報警都冇用，報案中心當人報假案直接CUT線，即時變成冇警時分，喺鬧市之中任劈唔嬲。
3.《濠江風雲》
《濠江風雲》雖然劈友場面冇前兩部咁經典，但勝在係由澳門社團14K話事尹國駒（外號：崩牙駒）投資拍攝。而《濠江風雲》就係以尹國駒嘅事跡為藍本而創作，電影由任達華、郭可盈、方中信主演。故事講述主角尹志巨由細個加入黑社會到成為話事人嘅奮鬥故事，中間同勁敵爭奪賭場利益而引起腥風血雨，劈友無數先可以成功喺澳門站穩陣腳。
網上圖片
