【從前有個荷里活】波蘭斯基懷疑李小龍係弒妻凶手只因一副眼鏡？
隨口噏話唔見左副眼鏡就懷疑人地係凶手，不如話全世界男人都係你老竇？
網上圖片
塔倫天奴最新執導嘅電影《從前，有個荷里活》，由里安納度狄卡比奧、畢彼特、瑪歌羅比主演。而電影最大嘅賣點就係以著名影星莎朗蒂被邪教文遜家族殘殺作為故事背景。不過，莎朗嘅老公電影大師羅曼波蘭斯基，當年就懷疑凶手係佢嘅朋友所為，就係李小龍。
網上圖片
喺1969年8月9日，文遜家族闖入莎朗蒂，殘殺屋內五人，當時莎朗蒂有八個月身紀，而波蘭斯基咁啱拍緊戲而冇事。當時波蘭斯基喺英國拍戲，當時美國差人查案進度相當慢，佢仲出錢買儀器希望可以加快查案進度，而且佢仲有一直同李小龍學功夫。但係佢竟然懷疑好朋友兼師傅嘅李小龍係殺妻凶手。只係因為差人喺凶案現場發現左一副眼鏡。
網上圖片
話說喺1968年嘅時候，莎朗蒂喺拍攝《風流特務勇破迷魂陣》(The Wrecking Crew)嘅時候就識左李小龍，因為佢當時就擔任呢部戲嘅「空手道顧問」（即動作指導）。兩個人相當投契，莎朗仲將李小龍介紹畀佢老公識，之後波蘭斯基仲請左李小龍做師傅。但一年之後，莎朗蒂就畀人虐殺，五屍六命。包括著名荷里活髮型師Jay Sebring，佢同李小龍都係相當熟絡。
網上圖片
當年李小龍住喺莎朗蒂屋企近，因為當時好多荷里活明星或者製作人都係住嗰一帶嘅豪宅地段。當年有傳聞指李小龍喺案發嘅時候去過莎朗屋企，教Jay Sebring功夫。不過，後來李小龍嘅傳記作者Matthew Polly就話冇咁嘅事，完全係不實傳言。而李小龍嘅太太Linda Lee都表示，佢當日冇去過莎朗屋企，甚至兩個人都冇見過面。而且，李小龍嘅訓練都冇紀錄當時有去同Jay Sebring訓練。
網上圖片
喺凶殺案發生之後嘅幾個月，波蘭斯基同李小龍一齊上堂學功夫，李小龍當時同佢講話副眼鏡唔見左，佢一聽到就即刻諗返起差人話凶案現場發現到一副眼鏡，令佢懷疑李小龍就係殺人凶手。於是波蘭斯基就同李小龍講話佢副眼鏡一向都唔好睇，落堂之後去眼鏡鋪揀副新嘅送畀佢做禮物。而令佢覺得最大疑似嘅就係，喺佢識得嘅人之中，就只有李小龍可以憑一己之力殺死咁多人。
網上圖片
但係，當佢地去左眼鏡鋪之後，波蘭斯基發現李小龍唔見左嘅眼鏡同凶案現場嗰副係唔同款，所以佢就知道自己怪錯好人。呢件事波蘭斯基一直都冇同李小龍講，直到佢喺1985年出版自傳先公開呢件事，但嗰陣李小龍已經過左生12年。
網上圖片
今次塔倫天奴將李小龍加到《從前，有個荷里活》，原來係冇問過佢屋企人嘅意見。李小龍個女李香凝（Shannon Lee）早前接受《Deadline》訪問嘅時候就表示：「塔倫天奴喺拍呢部戲嘅時候問過好多意見，但就係冇揾過我。咁當然會令我有咁上下不滿，但係呢啲事完全唔值得我浪費時間同精神。」李香凝仲有補充話：「之後嘅事就交畀命運處理。」
網上圖片
無獨有偶，波蘭斯基現任太太，法國巨星艾曼妞薛納（Emmanuelle Seigner）都表示塔倫天奴都冇問過波蘭斯基任何意見。
