【後果自負】網民熱議駐港解放軍演習片 其實港演員都拍過唔少主旋律軍事題材片
三部電影有兩部係梁家輝做主角，仲有一部係成龍主演。
網上圖片
因為八月一日係中國人民解放軍建軍紀念日，所以日前駐港解放軍就專登拍左條演習短片慶祝下，喺片除左見到解放軍幾咁英勇，仲可以見到班中國軍人同香港市民「打成一片」，深得香港市民愛戴。今次就專程搵到三部香港人有份拍嘅主旋律「軍事片」，賀一賀「建軍節」。
1.《太行山上》
網上圖片
《太行山上》係2005年拍攝嘅中國電影，為左紀念「抗日戰爭」勝利60周年而拍，由中國人民解放軍八一電影製片廠拍攝，由梁家輝扮演著名解放軍抗日名將賀柄炎。有忠實影迷專程剪輯梁家輝獨臂砍殺蘿蔔頭嘅精彩場口，雖然像素比較低，但大家都係可以欣賞下。《太行山上》劇情大概係講八路軍喺山西打游擊戰，痛擊日本軍隊並最終為中國帶嚟勝利。
2.《辛亥革命》
網上圖片
《辛亥革命》係中國大陸為左紀念辛亥革命一百周年而拍，由成龍自導自演，佢喺戲中飾演黃興。電影講述1911年武昌起義，到1912年孫中山辭任臨時大總統為止嘅一段歷史。成龍喺戲中扮演黃興，黃興當年主力喺前線領軍對抗滿清軍隊。
3.《智取威虎山3D》
網上圖片
《智取威虎山3D》係由香港導演徐克執導，改編自中國解放軍作家曲波嘅小說《林海雪原》嘅一段故事《智取威虎山》，喺文革期間亦係中國政府指定之一嘅樣板戲。電影由中國演員張涵予扮演主角楊子榮，香港演員梁家輝飾演大反派座山雕。《智取威虎山》故事講述解放軍喺中國東北剿匪，解放軍十六人小隊狙擊「座山雕」匪幫，但頭目座山雕逃入威虎山大本營。偵察排長楊子榮認為威虎山地形複雜，只能智取。楊子榮決定做臥底扮土匪潛入「座山雕」幫派，最後用計僅以十六個人全殲敵匪。《智取威虎山3D》成部戲最高潮嘅情節，就一定係共軍小隊打爆座山雕架飛機，成功殺敵。
