【電流戰爭】愛迪生專陰員工 偽發明大王專擸員工成果
愛迪生嘅所作所為就同時下香港電影工業嘅資深前輩一樣，唔出糧叫你蝕底啲，做完嘢之後連Credit都冇。
改編自愛迪生傳奇生平嘅電影《電流戰爭》（The Current War）一再延期，今個星期終於喺香港正式上畫，電影由「福爾摩斯」班尼迪甘巴貝治（Benedict Cumberbatch）、「蜘蛛俠」湯賀蘭（Tom Holland）同埋尼古拉斯侯特（Nicholas Hoult）多位男神主演。電影主要圍繞住發明電燈背後嘅爭奪戰。
1.直流電與交流電
網上圖片
《電流戰爭》以愛迪生角度出發，講述佢發明嘅電燈、留聲機到攝影機都完全改變世界，但係愛迪生同鐵路大亨威斯汀豪斯兩個人為左成為美國供電系統嘅最大輸送商而展開連番惡鬥。愛迪生發明直流電發電機，威斯汀豪斯發明交流電發電機，二虎相爭，仲有後起之秀嘅年輕發明家尼古拉特斯拉加入戰團。
網上圖片
愛迪生同西屋電氣公司嘅「電流戰爭」嘅企業戰係美國史上最出名嘅商業戰，但係被後世牧為天才發明家嘅愛迪生，事實只係個專門搶閘登記專利嘅奸商。喺佢1879年宣布成功發明電燈之前，已經有兩個工程師先後成功發明左電燈，但因為當時大家對於專利權嘅意識薄弱，愛迪生搶先兩人成申請專利，坐享其成。雙方仲曾經對簿公堂，但幾年打左幾年官司，其中一個發明家過生，愛迪生呃左佢嘅家人賣走專利。其實愛迪生只係將買返嚟嘅電燈專利，再改良下，而唔係好似小學教科書咁講係電燈發明者。
2.呃人會派獎金
網上圖片
尼古拉特斯拉發明交流電嗰陣係愛迪生嘅員工，但佢認為交流電先係世界嘅未來，所以膽粗粗同愛迪生講交流電嘅好處。但係愛迪生喺嗰陣已經擺左好多錢去研究直流電，所以拒絕左特斯拉。但兩人交惡嘅導火線其實源於一個「笑話」，愛迪生當時叫特斯拉研究點樣改善摩打同發動機嘅性，仲應承完成任務之後會五萬美金報酬。之後特斯拉完成任務，愛迪生因為咁而成功申請24項專利。但係，佢冇畀到承諾嘅五萬美金，佢反口話之前有獎金只係「講笑」，甚至唔肯加人工特斯拉。於是，特斯拉辭職轉投威斯汀豪斯嘅西屋電氣，引起電流戰爭。
3.竊取團隊研究成果
網上圖片
愛迪生號稱發明大王，一生人有二千幾項發明，超過一千五百項專利，但係大部分都係由佢請返嚟嘅團隊嘅發明作品，佢負責畀錢同實驗室，再用自己名義去申請專利，明利雙收，但係冇咩點真係落手做。嚴格嚟講，愛迪生唔係發明家，而係生意戈，佢嘅貢獻唔係科技發明，而係將電燈推廣到市民大眾，令電燈變得普及。但係佢為左私利，打壓員工，令到交流電冇辦法普及，令世界失去更好選擇，成為不折不扣嘅大奸商。
網上圖片
