《銀河守護隊》導演大讚張藝謀作品 最愛港產片兼想同任達華合作
睇嚟任達華有機會繼梁朝偉之後，成為第二位MCU作品主演嘅香港演員。
網上圖片
《銀河守護隊》導演占士根，可能因為戀童風波不了了之而心情特別好，近日佢喺twitter度出POST大讚張藝謀嘅「新作」《影》（嚴格嚟講張嘅新作應該係《一秒鐘》，不過因為「技術問題」搞到而家都未有得上畫）。《影》喺今年五月喺北美上畫，占士指《影》充滿活力，係佢今年最鍾意嘅電影。
網上圖片
其實占士係港產片影迷，喺幾年前佢喺Facebook上載左一張珍藏多年嘅港產片錄影帶嘅相，當中有《力王》、《英雄好漢》、《學校風雲》等等。佢仲話希望可以同任達華合作。今次就想介紹下相入面其他冷門少少嘅港產片，就算喺香港都可能未必有好多人睇過。
網上圖片
1.《玻璃鎗的愛》(Love, Guns & Glass) 1995
由任達華、葉童主演，故事講飾演白粉拆家嘅任達華坐左十年監，出獄之後老婆洗晒佢啲錢之後走佬。之後佢仲識左差幾十萬大耳窿嘅葉童，因為兩個都係窮途末路，所以好快就惺惺相惜一齊左，仲結埋婚。但係喺任達華坐監之前得罪左仇家，所以幸福生活維持唔得幾耐。
2.《俠盜高飛》(Full Contac) 1992
《俠盜高飛》由林嶺東導演，周潤發、任達華、黃秋生主演。劇情講述周潤發同黃秋生係一齊做保安嘅好朋友，但黃秋生因為差大耳窿而畀人捉走左，周潤發搏命去救佢返嚟。黃秋生為左還錢而求周潤發一齊去打劫，仲要係同任達華桿匪集團合作，發哥無奈應承。打劫成功之後周潤發畀任達華出賣，雙方火拼央及池魚，一個細路女全家死晒，周潤發為贖罪決定同任達華決戰，搶返贓款還畀細路女。
3.《廉政第一擊》(First Shot) 1993
網上圖片
《廉政第一擊》由狄龍、任達華、張曼玉主演，導演就係現今《字母風暴》系列嘅林德祿。電影主要講述ICAC成立初期嘅故事，廉政公署點樣喺勢孤力弱之下同警隊抗衡。
4.《黑貓》(Black Cat) 1991
《黑貓》由梁琤、任達華。劇情CIA睇中梁琤，佢畀CIA改造成高科技新人類，代號係「黑貓」。梁琤被派到香港執行任務，但佢喺米埔認識到米埔鳥類保護區嘅科學主任林祖輝，從中感受到生命嘅意義，決定唔再做殺人機器，逃離CIA訓練官任達華嘅追捕。
5.《冇面俾》(Don't Give A Damn) 1995
網上圖片
《冇面俾》係洪金寶監製，金城武、洪金寶、元彪、周海媚主演。電影講述金城武、洪金寶、元彪三個係差人，佢地喺一次嘅大型緝毒行動中，洪金寶打死左大毒販，搞到毒販個親生大佬要揾佢地報仇。
6.《殺手的童話》(A Taste of Killing and Romance) 1994
網上圖片
《殺手的童話》由劉德華、袁詠儀主演。劉德華為殺手集團嘅殺手，集團規矩就係任務失敗者死。某次嘅任務中識左袁詠儀，兩人互有好感。不過喺一次任務入面，劉德華為救個小朋友而搞到任務失敗，集團首領決定派出袁詠儀去執行會規，但袁詠儀落唔到手。另一邊廂警察為左瓦解殺手集團而追捕劉德華，集團都派出左其他殺手狙擊佢，令華仔多面受敵。
7.《赤腳小子》(The Bare-Footed Kid) 1993
《赤腳小子》由杜琪峯導演，郭富城、張曼玉、吳倩蓮、狄龍主演。電影翻拍1975年嘅邵氏電影《洪拳小子》，故事講述郭富城係個唔識字但又好打得嘅鄉下仔，出城之後反派曾江呃左，累死狄龍。最後為贖罪，郭富城用返狄龍敎佢嘅絕技去揾曾江報仇。
