【金馬獎】初選名單公布 台灣本土電影發光發熱 唔怕冇人嚟

Leng Zai @ UPower

金馬獎係華語影壇最有份量嘅電影獎項,今年金馬獎執行委員會主席係李安,評審團主席係杜琪峯。贏到金馬獎絕對係莫大嘅榮譽,可惜今年好多電影人都參加唔到。

網上圖片

早前中國國家電影局禁止中國電影報名金馬獎,而某啲香港電影人就呼籲大家響應國家號召,一齊唔好去金馬獎。咁暫時就未知香港電影到底會唔會跟隨國家指示,但肯定今屆台灣本土電影一定成為金馬獎大贏家,事關官方已經公布左初選名單。

《江湖無難事》劇照 網上圖片

第56屆金馬獎初選結果,先睇演員方面,鄭人碩主演嘅三部電影《人面魚:紅衣小女孩外傳》、《親愛的殺手》同《寒單》都過左初選;而邱澤都憑《第九分局》、《江湖無難事》過左初選,睇嚟今次兩位演員都有好大贏機會封帝。

《人面魚:紅衣小女孩外傳》劇照 網上圖片

鄭人豪曾經以《醉‧生夢死》、《角頭2:王者再起》兩度贏左台北電影獎最佳男配角,而邱澤就喺上年以《誰先愛上他的》成功喺台北電影獎拎左最佳男主角,兼成功入圍金馬獎。雖然邱澤拎唔到金馬影帝,但係就成功打破偶像包伏,轉型做演技派。

《人面魚:紅衣小女孩外傳》劇照 網上圖片

喺女演員方面,《人面魚》徐若瑄同《傻傻愛你》郭書瑤早前喺台北電影節都已經交過手,佢地好可能會喺金馬獎入面再次交鋒。曾經憑《再見瓦城》入圍金馬影后嘅吳可熙,今年可能會再次憑《灼人秘密》再次入圍金馬。

《你的臉》劇照 網上圖片

另外,導演方面,由趙德胤執導、吳可熙編劇主演,成功入選康城影展嘅《灼人秘密》;由鍾孟宏執導、入選多倫多影展嘅《陽光普照》,呢兩部揚名國際影壇嘅作品自然都會過到金馬獎初選。藝術電影大師蔡明亮嘅《你的臉》,早前橫掃台北電影節三項大獎,當然都有入圍。

《灼人秘密》劇照 網上圖片

最終嘅入圍名單將於十月一號揭曉,第五十六屆金馬獎將會喺十一月廿三日舉行。

Tagged:

Facebook Conversations