梁家輝執導《深夜食堂》票房成績麻麻 更慘遭內地網媒爆粗狠批
萬大事有國家包底，唔可以畀愛國藝人蒙受損失！
梁家輝首次自導自演嘅電影《深夜食堂》，係改編自日本漫畫家安倍夜郎嘅同名漫畫，呢部電影8月30日喺中國上畫。梁家輝仲碌盡人情咭請晒香港、中國同台灣嘅明星，包括：鄭欣宜、鄧超、彭于晏、楊佑寧、陳建州等等。但係《深夜食堂》在中國的票房慘不忍睹，上畫五日係得2000萬。高調撐警兼愛國宣言竟無助梁影帝嘅事業。
網上圖片
《深夜食堂》第一日上畫嘅時候，中國院線安排左68,000場次，但係頭三日嘅平均入場人數只有四至五個，完全吸引唔到中國人嘅興趣。唔少中國媒體都大彈《深夜食堂》，例如中國網媒「熱薦電影」就以「《深夜食堂》根本不『好』吃 梁家輝導演處女作終究X街！」為標題，內文就指：「每個流水賬的故事都是平鋪直敘，機械化講完」、「即便配上雞湯台詞，也還是一桌難吃的飯菜。」標題直頭爆晒粗大插梁家輝，成篇影評就係講套戲幾咁難睇。
網上圖片
有傳指《深夜食堂》其實一早拍完，但一直都冇辦法喺中國上畫，直到梁家輝喺6月30日撐完警之後，就即刻確定8月30日有得上畫。梁家輝當日就冇上台發言，但佢同前警司陳欣健一齊合照，仲話：「警方值得支持。」搞到唔少香港觀眾揚言要杯葛佢演出嘅電影。
網上圖片
當香港人知道《深夜食堂》喺中國冇人睇嘅時候，一班網友就喺連登度留言：「係咪又要返嚟香港啦？」、「係咪要改口支持香港示威民主自由了？」、改名做撐警食堂、建國食堂咪多人睇」。似乎都冇咩人同情梁家輝。
原著安倍夜郎嘅《深夜食堂》係講述一個背景不明，左眼有個謎之疤痕嘅老闆喺新宿開左一間餐廳仔，客人可以隨意叫自己鍾意食嘅嘢，老闆都可以整到畀大家食。老闆每晚都會遇到唔同嘅客人，聽到唔少不為人知嘅東京故事，例如喺Gay吧打工嘅變性人、普通打工仔、誤殺姦夫嘅逃犯、夜總會嘅媽媽桑。原作主要係想揭示東京低層生活，咁去到中國版就當然變左另一回事。
網上圖片
