【白宮淪陷3】僱傭兵集團一年收入過萬億 謝拉畢拿大戰僱傭兵
中國唔俾公民去做僱傭兵，不過香港就無相關嘅法例禁止，所以……
謝拉畢拿同摩根費曼主演嘅《白宮淪陷3：天使淪陷》近日正式上畫。今集故事講述摩根費曼已經由副總統紥職坐正做左總統，而謝拉畢拿就做左特勤局局長，不過就畀做緊僱傭兵嘅老死屈佢謀殺總統。所以今集任務要保護總統之餘仲要殺死好兄弟以證清白。
網上圖片
謝拉畢拿拍嘅動作片一部接一部，而今次嘅對手係僱傭兵，動作場面相當精彩，觀眾睇見都覺得肉緊。僱傭兵通常只會效忠份人工，而唔係僱主。多數做僱傭兵嘅人都常都係喺正常社會撈唔掂嘅人，又或者鍾意打仗殺人先會去做，正常人都唔會想做呢啲工。基本上僱傭兵個朵其實就唔太好，通常佢地會自稱係保安人員。
網上圖片
全世界有百幾間僱傭兵公司，其中一間Military Professional Resources Inc.(簡稱「MPRI」)係全球五大公司，喺1987年由八個前美軍資深將領組成，目前公司嘅管理層都係前美軍高層出任。有傳指MPRI總共有二千幾個退伇軍人。
網上圖片
通常呢啲僱傭兵公司都有政府做後台，因為各國政府都唔想直接派軍隊，所以僱傭兵公司主要係為唔同嘅國家同跨國企提供「戰爭服務」。因為份工相當危險，所以人工都相當高。僱傭兵嘅人工都會根據任務嘅危險程度，分成唔同等級嘅回報。以MPRI為例，一年可以賺到1000億至2000億美金。（7780億至1萬5560億港元）
網上圖片
因為回報高，好多無知少年都有個僱傭兵夢。喺2012年，中國海南省澄邁縣有兩個14歲同18歲嘅後生仔扮乘客搭三輪車，搶走司機啲錢之後再殘殺佢，棄屍落海。呢兩個人為左發達，畀左個目標自己，先炒股賺十萬，再打劫、偷竊、販毒、綁架賺夠一百萬，再去外國做僱傭兵，之後就嘆世界。遇害嘅司機嘅屍體淨上海面，畀村民發現，公安破案將佢地拘捕，摧毁佢地嘅發財夢。
網上圖片
其實呢，就唔係人人都做得僱傭兵嘅。首先根據中華人民共和國嘅法例，中國人係唔可以做僱傭兵（香港法例冇禁止，所以香港人可以做僱傭兵）。其次，好多僱傭兵公司都傾向請返退伇軍人，例如MPRI講到明只會請退伇軍人。有啲公司就只係要求通過到考試就得，成功之後就要受訓。
網上圖片
訓練課程都係基本嘅軍事訓練，包括：反恐戰術、受盡各種方式嘅侮辱、虐待，普通人絕對冇辦法接受。曾經有個《華爾街日報》記者透露，佢曾經見過一個受訓新兵畀人剝光豬吊起嚟喺營火度燒。平均每十個新兵只有一個可以完成兩個星期嘅訓練，好多都頂唔順而退出。但因為人工高，唔少退伇嘅軍人都會去做僱傭兵。
