【小丑回魂2】華納新招造勢 一石二鳥宣傳埋小丑女
咁下次應該會叫埋Joker、小丑女幫《小丑回魂2》宣傳，再唔係就整返個小丑宇宙出嚟。
華納兄弟出品嘅《小丑回魂2》即將上畫，香港要等到九月十二日先公映，好多影迷都相當期待。但之前首輪影評就唔太理想，甚至有影評人認為《小丑回魂2》係2019年最令人失望嘅電影。不過，最近華納就諗到新招為《小丑回魂2》造勢宣傳。
網上圖片
其實呢招都幾有創意，除左可以幫《小丑回魂2》谷票房之餘，仲可以幫由瑪歌羅比主演嘅《Birds of Prey (and the Fantabulous Emancipation of One Harley Quinn)）》做宣傳。
網上圖片
原本華納計劃今個星期公布《Birds of Prey》嘅第一條正式預告，但最近有傳指華納決定唔喺網絡發布預告，換成只會喺戲院放映《小丑回魂2》之前先會播出預告。即係話，觀眾只係可以入戲院睇《小丑回魂2》先會睇到《Birds of Prey》嘅預告。
網上圖片
話雖如此，其實上個星期已經流出左《Birds of Prey》嘅預告，嗰條預告係放完《蜘蛛俠：決戰千里》加長版之後先播出，即刻就喺互聯網流傳。雖然華納極速將流出預告下架，但而家都仲係可以喺網上揾到低清版嘅預告。
網上圖片
呢個流出版嘅《Bird of Prey》預告係嚟自烏克蘭，喺片中我地會見到華納嘅LOGO先，然後有《小丑回魂2》嘅紅色氣球飄出嚟，以為係「小丑」要出場嗰陣點知見到「小丑女」。佢用槌打爆晒啲氣球之後，就會見到《Bird of Prey》少少嘅片段，要等華納公布之後先可以再睇到更多。
除左有意外流出嘅預告之外，早排網上仲流傳左一段瑪歌羅比嘅現場拍攝花絮。畫面見到瑪歌吊住威吔，拉住條繩追住架車，拍左好幾個唔同嘅鏡頭。
