《復仇者聯盟4》做足準備爭入奧斯卡 網友評價兩極
羅拔唐尼一向係演技派，亦多次同影帝獎座失諸交臂。但係憑鐵甲奇俠贏影帝又係唔係實至名歸呢？
網上圖片
《小丑JOKER》今個月喺威尼斯影展成功捕獵最高榮譽金獅獎，唔少都覺得男主角祖昆馮力士係下屆奧斯卡影帝大熱。睇見DC咁強勢，迪士尼當然唔會放慢手腳啦，最近就積極幫《復仇者聯盟4 : 終局之戰》為奧斯卡造勢。
網上圖片
《復仇者聯盟4》喺上半年成為史上全球票房冠軍，下一步就係劍指奧斯卡。特別上年《黑豹》成功入圍奧斯卡最佳電影，最後成功拎左最佳原創音樂獎、最佳服裝設計獎和最佳藝術指導獎三個大獎，成為第一部MCU作品贏到奧斯卡獎項。而且迪士尼仲邀請左唔少美國傳媒參加特別放映會，叫齊晒合資格投票嘅評審去睇戲，希望可以拎到奧斯卡提名，預先為奧斯卡做好準備。
網上圖片
仲有就係，迪士尼專登為奧斯卡整左個官方網站，《復仇者聯盟4》將會喺洛杉機、紐約、舊金山、倫敦搞四場特別特映會，等評審去睇戲。當然迪士尼唔會淨係想《復仇者聯盟4》有提名，另外《獅子王》、《阿拉丁》、《反斗奇兵4》同埋《魔雪奇緣2》都係佢地嘅目標。呢個網站有晒以上五部作品嘅page，相當有心機。睇嚟迪士尼好想繼《黑豹》再一次揚威奧斯卡。
網上圖片
導演羅素兄弟亦都成日強調羅唐尼喺最近四部嘅Marvel作品入面表現出色，絕對應該要喺奧斯卡封帝。兩兄弟就表示，羅拔喺過去四十年入面，比起任何一個演員更應該拎到奧斯卡，因為佢直接推動左一個流行文化變成主流。兩位導演強調喺電影史入面，冇一個演員可以好似羅拔咁樣可以令全球觀眾喊到甩肺。導演表示如果羅拔咁成功都拎唔到影帝，都唔知道邊個會有資格拎。
網上圖片
但係，唔係個個人都睇好羅拔可以憑《復仇者聯盟4》入圍奧斯卡，因為今年最強對手就係DC嘅《小丑》，對家仲要拎埋金獅獎，令到全球觀眾極度期待呢部作品。有影迷認為祖昆馮力士贏面明顯高一截。
網上圖片
網友反應兩極，有忠實FANS就全力支持羅拔唐尼，又希望《復仇者聯盟4》可以多獎過《黑豹》。但係亦都有人認為迪士尼太大諗頭，質疑迪士尼將奧斯卡當成豬肉獎，仲認為呢兩屆奧斯卡變成笑話。
