《我的拳王男友》向佐畀拳王打到暈 杜琪峯為套戲唔做金馬
睇真啲張海報，原來個女主角係揸住支咪，唔好睇錯啦⋯⋯
今年中國帶頭杯葛台灣金馬獎，唔少香港電影公司、導演同埋演員都響應國家號召。香港電影教父杜琪峯上個星期辭任金馬獎評審團主席，係因為「與電影投資方的製作合約所限」。辭左職冇耐，杜SIR新作《我的拳王男友》就即出預告，11月8日會喺中國上畫。
網上圖片
《我的拳王男友》由杜琪峯執導、韋家輝編劇；向佐、王可如主演。電影故事講述向佐喺避債嘅時候遇到王可如，兩個人面對刻苦嘅生活都堅持打拳同做歌星嘅夢想。
網上圖片
為左電影更加真實，劇組仲專誠請左職業MMA拳手飾演向佐嘅對手，喺拍戲嗰陣，向佐仲試過畀對方打到暈低。之但係，似乎唔係個個觀眾都鍾意呢部《我的拳王男友》，有網友就話呢部戲唔會係杜琪峯韋家輝想拍嘅作品，仲指嚟到2019，仲會幫片名改做「我的XX男友」，相當老土。
網上圖片
《我的拳王男友》喺2018年2月煞青嗰陣就係叫做《追夢男女》，唔知點解會改名。如果係用返舊戲名又會唔會好啲呢？
網上圖片
向佐相信都唔需要多介紹，係《我的拳王男友》嘅投資人向華強嘅大仔，佢為左演好拳手角色，都用左唔少心機操FIT自己。至於女主角王可如，喺2016年出道，拍過馮小剛導演嘅《芳華》。喺上年曾經畀傳媒影到向佐同王可如喺香港行街，當時仲傳出緋聞。後來由向佐嘅媽媽陳嵐澄返，話兩個只係普通朋友。向佐喺九月嗰陣已經同台灣演員郭碧婷結左婚，向太仲喺中國嘅綜藝節目大讚呢位台灣新抱。
網上圖片
