【雙子任務】500人特效團隊歷時兩年精心打造回春版韋史密夫
如果係香港電影，相信不論用幾多年都只會見到膠史密夫。
網上圖片
李安新作《雙子任務：疊影危機》喺尋日(10/10)已經喺香港開畫，今次故事講述韋史密夫飾演特工「亨利」，正打算金盤洗手嘅時候，就畀一個神秘特工「小克」追殺，而呢個殺手竟然係同自己生得一模一樣嘅後生仔。為左幫韋史密夫重現青春，劇組用左總共有500人嘅特效團隊，傾盡全力要將後生版韋史密夫重現銀幕。
網上圖片
要成功回春，除左特效技術要出色之外，韋史密夫仲話要調整表演方法，首先要將自己51歲嘅中坑語氣改得後生啲；其次，雖然兩個角色同一個人，但始終係生活喺唔同嘅時空，所以韋史密夫要用唔同嘅方式同口音講對白，為兩個角色創作出細緻嘅分別。
網上圖片
另外喺動作打鬥方面，中坑自然冇後生咁身手敏捷，但係可以留心返兩個嘅打鬥風格。退伇特工亨利，因為受訓嘅方式比較傳統，格鬥方式比較接近拳擊手，韋史密夫仲認為亨利一定唔會起腳踢人。反而小克注定成為殺人機器，所以唔會有底線，就好似MMA選手一樣，為左擊倒敵人而出盡一切招數。
網上圖片
導演李安為左追求真實感仲專登要求韋史密夫做一樣嘢，搞到佢尷尬到不得了。由於韋史密夫要做返23歲嘅自己，所以李安就專登要求佢唔好做得咁好，李安仲揾左佢後生嗰陣嘅演出畀返佢重温參考，搞到佢唔敢睇返，因為覺得好尷尬。
網上圖片
李安同500人嘅特效團隊，用左超過兩年時間去整後生版韋史密夫，利用動庇捕捉同埋數碼影像，重現後生嘅韋史密夫。當事人見到咁後生嘅自己再現銀幕，覺得非常震撼。今次除左要用高科技重現分身之外，韋史密夫仲要親身上陣做兩次戲，首先做一次亨利，然後再戴返套動態捕捉嘅裝備，再喺同一個場景做多次戲扮演小克，相當認真。
