艾慕杜華自傳作品《萬千痛愛在一身》 追溯大師慾望源頭
大師言志之作。
西班牙國寶導演艾慕杜華（Pedro Almodóvar）嘅自傳電影《萬千痛愛在一身》（Pain and Glory），係大師沈澱六十年之作，以御用演員東尼奧班達拉斯（Antonio Banderas）做自己分身，喺銀幕同觀眾道出自己人生故事，放低往日恩仇、回憶童年貧苦生活、論盡自己阿媽、為大家追蹤欲望規條嘅源頭，電影與人生互為一體。
網上圖片
《萬千痛愛在一身》係艾慕杜華嘅自傳電影，但又唔似一般嘅傳記電影嘅劇情咁高低起伏，佢嘅御用男主角安東尼奧班達拉斯，飾演一個遇到創作樽頸嘅兼傷病纏身嘅中年導演，成部電影係由童年片段同現實生活交錯敘事，經歷時間嘅洗練，令到男主角重新再睇返自己嘅人生。
網上圖片
最近七十大壽嘅艾慕杜華，雖然安排左今年五十九歲嘅安東尼奧扮一個叫做Salvador Mallo嘅西班牙導演，但安東尼嘅戲中嘅外形完全係中年艾慕杜華咁款。電影講述導演願意同一個反左面嘅演員和解，大家放低三十二年嘅仇怨，甚至一齊借海洛英消愁，相當坦蕩。艾慕杜華嘅電影風格強烈，用色大鳴大放，但喺電影入面嘅導演相當柔弱，等緊人去修復佢身心嘅傷痕。
網上圖片
喺電影有唔少篇幅係講導演嘅童年往事，呼應返艾慕杜華自己嘅作品《論盡我阿媽》、《聖‧教‧慾》及《慾望的規條》，佢嘅非一般童年相信可以啓發到每一個觀眾。就算喺導演細個嗰陣因為有唱歌天份，天主教學校唔洗佢讀書都可以升班，但求知若渴嘅佢自發喺屋企讀盡經典，仲因為咁教到文盲嘅靚仔哥哥讀書識字，喺電影尾段仲講埋自己性向覺醒。
網上圖片
安東尼奧班達拉斯拍左《慾望的規條》之後就去左荷李活發展拍商業片，今次返到西班牙，飾演艾慕杜華化身，仲贏埋康城影帝，完全係實至名歸。今次導演再次揾返彭妮露古絲（Penelope Cruz）扮阿媽，可見喺佢心目中嘅媽媽永遠都係咁靚。喺電影結尾嘅神來一筆，令成部電影錦上添花。
