【危險人物】導演曾想拍前傳？ 25周年嘅25件趣事 (上)
今年好多經典電影都係25周年。
喺廿五年前，昆頓塔倫天奴憑住佢嘅第三部長片作品《危險人物》，成功贏左康城影展最高榮譽金棕櫚大獎，當年嘅對手包括奇斯洛夫斯基《藍白紅三部曲之紅》、張藝謀《活着》、巴提斯謝侯《瑪歌皇后》。
網上圖片
1994年電影佳作紛陳，例如：《阿甘正傳》、《月黑高飛》、《生死時速》、《飲食男女》等等。而《危險人物》一定係其中嘅經典之作，雖然當年嘅奧斯卡最佳電影係《阿甘正傳》，不過《危險人物》只有八百萬美金預算，但係喺全球票房拎左兩億美金，創造紀錄。
網上圖片
《危險人物》鞏固塔倫天奴喺荷李活嘅一線地位、亦都令當時已經回晒塘嘅尊特拉華達重上事業高峰、同時間都令更多觀眾識得森姆積遜、亦都見證左奧瑪花曼事業起飛。
趁住電影上畫二十五周年，一齊睇下戲裏戲外嘅趣事。
1.肥尊去廁所
網上圖片
喺《危險人物》嚟講，去廁所唔係一件好事，每當肥尊喺有去廁所嘅場面嘅嘅時候，就一定會有事發生。佢喺電影入面總共去左三次廁所，第一次去回返嚟就發現奧瑪花曼食太多毒品；第二次去完之後，佢同森姆積遜食早餐嗰間餐廳就畀添羅夫打劫；到左第三次，啱啱喺廁所出嚟冇耐就畀布斯韋利士開槍打死。
2.仲細過「零」嘅肥尊
網上圖片
本來劇組想揾丹尼爾路易斯，或者布斯韋利士呢啲有票房保證嘅明星去演Vincent Vega，因為當時肥尊已經過晒氣，塔倫天如個經理人同記者講話：「尊特拉華達仲細過零。」，意思即係話佢冇票房價值。不過，塔倫天奴見完肥尊之後，就堅持一定要用佢，後來就成功見到肥尊做左主角，而布斯韋利士都有份做要角，大團圓結局。
3.大家都係一家人
網上圖片
肥尊飾演嘅角色係Vincent Vega，同時亦都係《落水狗》由米高麥臣飾演嘅Mr. Blonde（Vic Vega）個細佬，塔倫天奴仲為兩兄弟諗左個外傳故事，不過最後拍唔成。原本塔倫天奴想揾米高麥臣做Vincent，但佢唔單止托手肘，仲大肆批評個劇本，話好似作嘔作左三個鍾。塔倫天奴自然就好失望，一直到再揾返米高麥臣做《標殺令2》之前，佢地都冇傾過偈。
4.粗口
網上圖片
喺呢套戲入面，總共出現左265次「fxxk」，有網友認為有超過一半粗口都應該係由森姆積遜講。
5.筆記簿
網上圖片
塔倫天奴喺三十歲嗰陣走左去荷蘭阿姆斯特丹閉關，用左三個月時間寫成《危險人物》嘅劇本，喺電影入面亦都多次提及阿姆斯特丹。佢當年買左幾本筆記簿去寫劇本，最後電影贏左奧斯卡最佳原創劇本，亦都惟一嘅奧斯卡獎座。
6.Honda車
網上圖片
布斯韋利士喺呢套戲揸嘅車係Honda Civic，似乎塔倫天奴好鍾意呢款車，喺佢唔同嘅作品都會見到呢款車，例如《危險關係》、《標殺令2》都會叫到呢款車。
7.雪佛蘭
網上圖片
肥尊喺戲入面嘅座駕係1964年款雪佛蘭Malibu開篷車，其實係塔倫天奴自己部車，但喺套戲上左冇耐就畀人偷左。2013年，喺加州有個叫Bill Hemenez嘅人用左四萬蚊美金去整呢部車，其實佢已經買左呢部Malibu好多年，佢冇睇過危險人物》，買嗰陣都唔知邊個係塔倫天奴，只係貪平買左老鼠貨。
8.到底有冇着褸 ?
網上圖片
喺呢場吸毒過量嘅戲入面，一開頭我地見到奧瑪花曼着左肥尊件啡色褸，點煙嘅鏡頭係見到佢冇着褸，但係點完煙之後件褸又出現返。
9.奧瑪花曼覺得劇本太得人驚
網上圖片
當年有唔少演員都爭做Mia呢個角色，塔倫天奴見完奧瑪花曼之後就覺得佢係最佳人選。不過，一開頭佢唔想接呢個角色，當年只係得23歲嘅佢覺得呢個劇本太得人驚，後來塔倫天奴求左佢好耐，卒之應承左做戲。
10.名嘴都差啲做埋戲
網上圖片
美國名嘴愛倫狄珍妮絲（Ellen DeGeneres），即係《The Ellen Show》個主持，佢曾經試鏡飾演Jody呢個角色，即係成面穿晒環嘅毒販個老婆，最後由露姍娜雅奇(Rosanna Arquette)做左呢個角色。
11.細佬變阿妹
其中一幕，有個後生仔埋伏左喺廁所好耐，然後再衝出嚟亂槍掃射肥尊同森姆積遜，但一槍都冇中，呢個後生仔由Alexis Arquette飾演，佢係艾美獎最佳女配角柏翠茜雅格(Patricia Arquette)，同埋穿環老婆露姍娜雅奇個細佬，不過後來Alexis接受性別重置手術，細佬變左妹。最後Alexis因為感染愛滋病過生。
12.史提夫布斯美客串做侍應
網上圖片
主演過《落水狗》嘅史提夫布斯美（Steve Buscemi）喺《危險人物》客串做餐廳侍應，因為佢喺前作做得好出色，所以塔倫天奴再揾返佢參演《危險人物》。
13.點樣將腎上線素打入身體 ?
網上圖片
因為奧瑪花曼吸毒過量，所以肥尊要喺佢心口度注射腎上線素急救。喺拍呢場戲嗰陣，其實係拍肥尊抆支針出嚟，之後再喺後期製作嗰陣回帶播返出嚟，咁睇落就好似大力拮支針落去咁。
