【星戰迷福音】《權力遊戲》D&D 退出《星戰》新三部曲系列
6間大公司爭住要呢兩個人。到底係觀眾唔識貨，定係有人做左水魚呢？
網上圖片
本年度艾美獎最佳劇集《權力遊戲》嘅兩位靈魂人物 David Benioff 同埋 DB Weiss（簡稱：D&D），有睇晒八季嘅觀眾都知道最後變成爛尾劇，搞到一班影迷相當不滿，早前迪士尼宣布揾左D&D去拍2022年推出嘅《星球大戰》新嘅三部曲系列，搞到所有星戰迷相當鼓譟，要求迪士尼換人。不過，人生如戲，最近兩位人兄決定唔同迪士尼搞《星球大戰》三部曲，相信一班星戰迷可以放下心頭大石。
網上圖片
根據外國媒體Deadline報導，D&D表示佢地雖然好鍾意《星球大戰》，但係之後佢地完全冇時間，所以就拒絕迪士尼邀請。至於點解佢地會咁忙呢？係因為佢地一早就同Netflix簽左為期五年嘅合作協議，價值總共有三億美金。根據報導其實除左Netflix之外，仲有五間大公司爭奪呢對爛尾孖寶，包括：HBO、迪士尼、Amazon、Comcast、Apple。最後由Netflix成功搶到D&D。
網上圖片
D&D喺聲明度表示：「一日得嗰咁多個鐘頭，我地覺得冇可能同時間做到《星球大戰》同埋Netflix嘅項目，所以最後只可以拒絕迪士尼。」（其實潛台詞即係Netflix畀得多錢啲。）
網上圖片
雖則D&D反口過檔，但係盧卡斯影業主席Kathleen Kennedy 就冇乜不滿，佢仲為呢對爛尾兄弟留埋後路，佢表示：「D&D講故事嘅技巧相當出色，我地好希望未來可以繼續同佢地合作，等佢地得閒啲嘅時候可以繼續專注搞《星戰》。
網上圖片
全球六大影視公司出天文數字爭住要D&D，甚至連盧卡斯影業都唔介意佢地做反骨兄弟，表明會等佢地返嚟。睇嚟全世界只有《權力遊戲》嘅FANS唔鍾意D&D。
網上圖片
順帶一提，李安導演嘅最新作品《雙子任務：疊影危機》雷聲大雨點小，最大嘅批評就係劇本唔理想，原來呢部戲嘅其中一個編劇就係David Benioff。
