兩大巨星重返《蟻俠3》 量子領域係一大關鍵
睇嚟MCU嚟緊將重心放喺蟻俠。
網上圖片
金像影帝米高德格拉斯（Michael Douglas）喺MCU作品入面飾演「第一代蟻俠」皮漢克博士，同時都係發現「量子領域」嘅關鍵角色。早前米高接受外國媒體《Collider》訪問嗰陣，爆響口指自己會繼續做第一代蟻俠，同時間講埋電影公司會喺2021年開拍《蟻俠3》。
網上圖片
最近米高德格拉斯為左宣傳佢嘅Netflix新劇《荷里活教父》第2季，同傳媒證實將會重返MCU，佢表示Marvel世界好有趣，同埋亦都樂在其中。另外亦有消息指出《蟻俠》系列導演彼頓列特(Peyton Reed)會繼續執導第三集，希望可以喺2022年上畫。有分析指《蟻俠3》會係《復仇者聯盟：終局之戰》之後嘅世界，亦都係連接成立「少年復仇者」嘅劇情，會係自《美國隊長3》以嚟最重要嘅MCU獨立電影。
網上圖片
雖則就仲未知「少年復仇者」會唔會加入埋MCU世界，Marvel CEO奇雲費治以前就講過會喺漫畫入面攞靈感，所以喺電影系列會加埋蟻俠個女Cassie，等佢畀老竇啟發，埋下拯救世界嘅種子。
網上圖片
其實「量子領域」喺第一集《蟻俠》已經留左伏線，去到《蟻俠2：黃蜂女現身》先正式出場，預計去到第三集會發掘更多量子領域嘅秘密。導演以前講過，喺《黃蜂女現身》雖然講左好多量子領域嘅事，但其實唔多，感覺就好似將腳趾浸落水。
網上圖片
第一代黄蜂女係由天后米雪菲花飾演，既然揾得咁大牌嘅明星就當然唔會畀佢就咁行行企企，喺《黃蜂女現身》入面佢得嗰幾分鐘戲份，去到第三集珍納博士肯定會變得更加重要。
網上圖片
