大衛芬查同Netflix再度合作拍《唐人街》前傳 《破案神探》第三季有排等
《唐人街》經典對白，積尼高遜：「死開啲啦。契弟！」（真實對白）
網上圖片
導演大衛芬查 (David Fincher) 繼《破案神探》(Mindhunter) 、《紙牌屋》(House of Cards)同埋《愛．死．機器人》(Love, Death & Robot) 之後再次同Netflix 合作，佢嚟緊會為波蘭斯基 (Roman Polanski) 執導嘅經典作品《唐人街》(Chinatown)開拍續前傳劇集。最重要嘅係，劇集揾左電影編劇羅拔坦尼 (Robert Towne) 。
網上圖片
波蘭斯基喺1974年執導《唐人街》，故事發生喺1937年嘅洛杉機，由積尼高遜主演，劇情講述本來積尼高遜喺唐人街做差人，不過後來覺得唐人街係個永遠嘅罪惡城，決定辭職做私家偵探，之後有客揾佢查一單通姦案，點知最後捲入錯綜複雜嘅大陰謀，結局不論睇幾多次都會覺得超驚訝。《唐人街》絕對係經典之作，當年呢部戲以320萬美金預算拎到近300萬美金票房，之仲提名11項奧斯卡大獎，不過當年對手係另一部神作《教父2》(The Godfather II)，不過最後編劇羅拔坦尼都贏到最佳原創劇本。
網上圖片
喺1990年《唐人街》推出續集，積尼高遜自導自演，仍然係由羅拔坦尼做編劇。可惜換左導演之後，續集成績唔理想，1900萬美金成本最後只係收返1000萬票房。據傳今次劇集版《唐人街》會着重積尼高遜後生嗰陣當差嘅故事，Netflix 希望由大衛芬查親操刀執導試播集，不過而家仲未傾得成。
網上圖片
近年大衛芬查同Netflix 合作嘅劇集都一面倒好評，不論係《愛．死．機器人》定係《破案神探》都為Netflix 帶嚟熱潮。大衛芬奇而家除同Netflix 搞《唐人街》之外，雙方其實仲另一個合作計劃。
網上圖片
另一個計劃就係電影《Mank》，呢部電影係《大國民》(Citizen Kane)嘅編劇荷曼文高威斯 (Herman J. Mankiewicz)嘅傳記電影，大衛芬查嘅爸爸積芬查 (Jack Fincher)擔任電影編劇，亦都係佢嘅遺作。
大衛芬查同Netflix 已經成為黃金組合，自然揾到驚世卡士，《Mank》由奧斯卡影帝加利奧文(Gary Oldman) 主演，另外仲有《權力遊戲》查理斯丹士 (Charles Dance)、《媽媽咪呀》(Mamma Mia!)雅曼達施菲(Amanda Seyfried)、《親愛的，原來是你》Lily Collins 等人。而家《Mank》仲未有更多嘅消息，暫時電影會拍以黑白畫面呈現。
網上圖片
所以，想睇第三季《破案神探》嘅朋友要再等多幾年，起碼要等導演拍完《唐人街》劇集前傳同埋《Mank》先。
