豪華戲院光榮結業 戲院女廁原來好猛鬼？
而家執左笠，連鬼都冇地方去。
網上圖片
最近有28年歷史嘅旺角豪華戲院正式執笠，呢間係香港碩僅存嘅舊式大戲院。不過，因為戲院長年唔見光，環境比較陰暗，可能容易招惹鬼魂，而豪華戲院都算係比較耐歷史，唔少觀眾都表示曾經喺呢間戲院遇過怪事。Viutv節目《總有一瓣喺左近》曾經去過豪華實地考察，節目組聲稱見到靈體。
網上圖片
網上一直流傳，有觀眾喺豪華睇完戲之後，散場嗰陣行樓梯離開好容易遇到怪事。有觀眾表示，沿住出通道嘅樓梯一路行落去，直到經過一個女廁嘅時候會發現扶手有一條紅繩，個女廁嘅門口係打開左，但係就聽到好似有人衝過去撞度門嘅聲，之後再行落一層又係女廁。但呢位觀眾冇再行落去，因為佢見到有一個長頭髮耷低頭，着住白衫嘅「人」企喺度。樓梯燈光太暗所以分唔到係男定女，佢只係見到白衫個邊邊位露出左少少腳趾，本身嗰位觀眾驚係白衣人有精神病，即刻走人。
網上圖片
不過，行落樓嗰陣，觀眾同埋佢朋友都覺得自己個身突然重左好多，幾經辛苦跑到樓下，但道門又卡實左，驚到失禁（形容詞）之際終於開到門離開。傳說有好多人喺豪華睇完戲之後，喺同一條樓梯見到白衣人，有人話佢係冇面，亦都有話佢係成面血，眾說紛紜。
網上圖片
ViuTV節目《總有一瓣喺左近》，節目組都有去過豪華戲院，靈探就表示一入戲院就喺電梯上面嘅橫樑見到有男鬼坐喺度，經過嗰個全身發麻。入左影院之後就到有鬼喺第一排靠牆嗰邊睇戲，另外喺中間位置第三排，就睇到有一男一女嘅靈體睇緊戲。（其實有可能係人都唔定）
網上圖片
之後節目組人員喺戲院入面見到一間房，睇落似係雜物房。靈探見到一個後生媽媽靈體，佢着住白色短袖衫，抱住一個冇着衫嘅BB企喺角落頭。主持就話行到樓梯位就覺得唔舒服，好有壓逼感。
網上圖片
然後兩個主持去到猛鬼熱點嘅女廁門口，靈探喺玻璃窗嘅倒影見到，喺女廁個鏡入面有個大約六十歲嘅阿伯，佢得個頭，同有好長嘅頸，阿伯個頭由鏡入伸出嚟，應該一路都喺女廁入面，但係兩位主持拎住機入去廁所嗰陣，阿伯就唔喺廁所度。
網上圖片
但係另一方面，好多觀眾就表示去過豪華無數次，都見唔到有鬼。以小編為例，自小幫襯豪華，直到最近執笠前夕都有去，亦都喺度睇過鬼片，從未撞鬼，反而試過聞到尿味。順帶一提，喺2016年嘅時候，有女觀眾去戲院廁所嘅時候，發現抽氣扇裝左針孔攝錄機，之後報警處理，但係最後都不了了之，到而家戲院執笠都未知係邊個裝機偷伯人。
