【神探白朗】「美國隊長」着穿窿冷衫引熱話 同款熱銷一早售罄
美國隊長着件爛衫都可以造成話題。
網上圖片
就算平時入戲院淨係睇英雄片都好，相信都會有興趣睇今次新片《神探白朗：福比利大宅謀殺案》（KNIVES OUT），因為卡士陣容強大、橋段出人意表，所以電影喺美國開畫之後評價唔錯。尤其是係「美國隊長」基斯伊雲斯嘅FANS就更加要入場睇戲。喺電影入面，有影迷留意一樣表面上唔太關事嘅嘢，戲中嘅寸嘴有錢仔Ransom Drysdale（基斯伊雲斯 飾）竟然着左件爛左嘅米白色冷衫，惹嚟唔少觀眾討論，原來呢件爛衫係另有意思。
網上圖片
《神探白朗：福比利大宅謀殺案》由萊恩莊遜（Rian Johnson）執導，講述一個著名犯罪小說家Harlan Thrombey喺八十五歲大壽嗰日喺豪宅離奇死亡。大偵探白朗（丹尼爾基克 飾）受到神秘人邀請而調查呢單案。但係佢發現到呢個大家族表面上和諧共處，其實貌合神離，人人暗啞底為左遺產而爭崩頭。
網上圖片
Ransom Drysdale係個敗家仔，死剩把口，專門踢爆屋企人嘅虛假一面。呢個敗家仔成日都會着住啡色長褸，入面襯左件米白色冷衫，但係呢件冷衫竟然穿左個窿，連個衫領都勁殘。原來呢件爛衫係劇組專登設計，令成個角色更加真實。
網上圖片
電影嘅服裝指導Jenny Eagan早前接受《Hollywood Reporter》訪問指出，呢件衫可以顯出Ransom嘅背景同特點，因為佢出身自有錢特權階級，Jenny 覺得呢件冷衫可以襯到其佢嘅身分，而佢係個畀人寵壞嘅敗家仔，洗錢唔眨眼，係咁瘋狂買靚衫靚車。所以就算件衫幾貴都好，佢都會求其掉埋一邊，Jenny 話Ransom對件衫嘅態度就反映出佢對自己家族一樣，都係唔多點關心。
網上圖片
呢件穿窿嘅冷衫意外成為焦點，由上畫到而家都有唔少觀眾喺度討論。服裝指導Jenny 就話，好多人都覺得有錢人就係可以一路都着白色衫，因為佢地唔會怕整污糟件衫。Jenny就表示嗰陣揀衫揀得好趕，所以佢唔知件冷衫咩牌子。不過，一班瘋狂影迷喺網上就揾到類似呢款嘅冷衫，但係就一早賣晒。另外亦都有日揾相近嘅圓領冷衫，售價$179美金（大約1400元港幣）。
