【007生死有時】由預告睇到占士邦系列五大必備特色

一般人都係得閒死唔得閒病，但占士邦就調返轉。

第二十五部占士邦系列電影《007：生死有時》（No Time To Die），喺拍攝期間多災多難，最近終於發布第一條預告，今次亦都係丹尼爾基克（Daniel Craig）最後一次做占士邦，而反派就係由奧斯卡影帝雷米馬力克飾演。今次故事講述占士邦喺牙買加享受退休生活，佢個CIA朋友Felix 忽然走去求佢，希望佢可以幫手救返個畀人綁架嘅科學家，但係今次嘅任務唔係咁簡單，因為佢嘅敵人係一個用最新科技武器嘅壞人Safin。

大家淨係睇個預告都會見到007系列嘅元素，一齊睇下007必備五大特色。

1. Aston Martin DB5

占士邦嘅經典座駕Aston Martin DB5，就算唔係車迷或者007迷都好，相信都會認得呢部同占士邦一齊出任務嘅專車。早喺1964年嘅第三部邦片《鐵金剛大戰金手指》入面已經出現過呢部Aston Martin DB5，當時呢部車已經好多機關、武器同道具，可以轉車牌、裝左半自動機關槍、可以升起嘅防彈金屬皮、個助手席仲可以彈射上半空。

喺《007︰生死有時》嘅預告，大家一樣都可以見到占士邦揸住架D85、當然仲可以防彈兼裝埋機關槍。

2.好朋友Felix 

Jeffrey Wright飾演嘅CIA特工Felix Leiter 係占士邦系列嘅常客，喺2006年嘅《新鐵金剛智破皇家賭場》就開始亮相，嗰陣佢拎左啲錢畀占士邦，同埋喺過去唔同作品入面會畀情報。今次預告又見返Felix，當然又係負責畀任務資訊啦。

3.扮死退休

 

喺現實世界，男主角丹尼爾講明最後一次做占士邦，其實係戲內嘅占士邦都係一路都想退休嘆世界，甚至乎會扮死。喺1967年嘅《鐵金剛勇破火箭嶺》，辛康納利飾演嘅占士邦係詐死始祖。

 

喺2012年嘅《新鐵金剛：智破天凶城》試過詐死、喺2015年嘅《007：鬼影帝國》就着草。今次用返舊橋，仲搞到Ｑ以為佢真係死左。

 

4.反派一定有身體缺撼

 

新作賣點之一就係反派由奧斯影帝米馬力克演出，喺預見到影帝全場蒙晒面，到最後先見到佢嘅爛面樣。

 

其實咁多年以嚟，007系列嘅反派多數都係毀容或者係殘疾。例如喺1967年嘅《鐵金剛勇破火箭嶺》，Blofeld嘅右邊面有條直落劃過右眼疤痕，睇個樣右眼似乎已經盲左。