【愛爾蘭人】五大幕後秘聞 馬田史高西斯重現舊作場景

Leng Zai @ UPower

估唔到竟然會有史高西斯宇宙(Scorsese Universe)。

Netflix最近上架馬田史高西斯(Martin Scorsese)執導嘅史詩式黑幫大作《愛爾蘭人》(The Irishman),有兩大殿堂級影帝羅拔迪尼路(Robert De Niro)同埋阿爾柏仙奴(Al Pacino)主演。《愛爾蘭人》改編自Charles Brandt嘅回憶錄《I Heard You Paint Houses》,記錄左黑手黨成員Frank Sheeran嘅生平。故事時代背景橫跨50年代至70年代,講述二戰後美國嘅黑幫時代。打過二戰嘅「愛爾蘭人」Frank Sheeran 專幫黑手黨頭目Russell Bufalino 做殺手,藉住「愛爾蘭人」嘅殺人經歷帶美國政治最黑暗嘅面,當時最震驚全美嘅懸案就係工會主席Jimmy Hoffa 無故失蹤,背後竟然係涉及複雜嘅政治黑幕。

網上圖片

《愛爾蘭人》畀《時代雜誌》選為2019年十大電影之一,絕對有機會問鼎奧斯卡。不過其實《愛爾蘭人》其實有唔少製作上嘅趣事秘聞。

1.馬田史高西斯同羅拔迪尼路第十次合作

網上圖片

羅拔迪尼路向來都係馬田史高西斯嘅御用演員,佢地之前已經一齊拍左十部作品,包括《窮街陋巷》、《的士司機》、《紐約紐約》、《狂牛》、《喜劇之王》、《盜亦有道》。其中佢憑《狂牛》贏到奧斯卡影帝。而另一位影帝阿爾柏仙奴,佢就係第一次同馬田合作。(亦都可能係最後一次。)

2.馬田史高西斯生涯最長電影

網上圖片

原本《愛爾蘭人》原本預計片長係4個鐘頭,早前傳出電影會拆成兩集上架,剪左幾次之後變成而家嘅3.29小時嘅完整版,同時亦都係馬田拍過最長嘅電影。

AP圖片

之前導演受外媒訪問嗰陣,佢表示知道有網友覺得拍做劇集會好啲,佢回應話:「呢部戲係要講好耐嘅故事,仲可以拍做兩季劇集,不過我從來冇諗過要咁做。因為拍電影,講求積累細節,套戲播完嘅時候就會睇到累積而成嘅效果,如果坐定定睇晒部戲,就會睇到唔同嘅嘢。」

如果大家冇專心睇呢部電影,可能睇睇下就撳個暫停掣走去搞其他嘢,咁一定會令到成部電影嘅觀感變得唔好,同埋會唔知道點主角Frank 最後點解會咁做。

3. 製作到拍攝耗時近200日  多達300個拍攝場景 去左117個拍攝場地

網上圖片

今次電影片長達三個半鐘,由2017年8月開機,總共拍左108日,喺開拍之前90日已經開始做準備工作。馬田嘅導演生涯入面從來都未試過拍咁耐日子,劇組仲去左117個地點拍攝,搭左309個拍攝場景。

4. 重現《盜亦有道》經典場景

網上圖片

喺《愛爾蘭人》入面會睇到其中一個角色 Joe Gallo 行左入一間Copacabana漑酒吧,其實喺導演嘅《狂牛》同埋《盜亦有道》都有出現過。

網上圖片

同時,有唔少觀眾都覺得《愛爾蘭人》同《盜亦有道》有唔少場景都好相似。例如喺《愛爾蘭人》入面羅拔迪尼路同Whispers DiTullio喺一間餐廳見面。喺《盜亦有道》,兩個主角Jimmy(羅拔迪尼路 飾)想呃 Henry(Ray Liotta 飾)去佛羅里達州嘅場景,都係喺同一間餐廳發生。

網上圖片

5. 羅拔迪尼路以外嘅主角人選

網上圖片

導演喺開始籌備呢部電影嗰陣,已經好肯定要揾羅拔迪尼路做男主角。不過佢擔心迪尼路會配合唔到檔期,或者可能唔想做呢個角色,所以已經揾左另外兩個男演員去做替補,分別係《救參96小時》系列尼安納遜,同埋「前」《占士邦》系列男星皮雅斯布士南。等緊羅拔迪尼路答覆嗰陣,導演又驚另外兩個「候補」做唔到「愛爾蘭人」嘅口音(但其實皮雅斯係喺愛爾蘭出世),不過好彩最後迪尼路應承拍呢套戲。

Facebook Conversations