暗示迪士尼下次要買起007？ 迪士尼CEO：我不嬲都係《007》FANS
到時邦女郎係唔係要戴埋米奇老鼠耳仔演出？
網上圖片
最近時代雜誌就揀左迪士尼CEO卜艾格(Bob Iger)為今年嘅「年度商業風雲人物」，佢接受《時代》訪問嗰陣，就被問到迪士尼之後打算買邊啲出名嘅版權，佢就話而家有咁嘅計劃，但係自己就好鍾意《占士邦》系列。
網上圖片
《時代》列舉出大量經典電影畀卜艾格去揀，包括：《哈利波特》(Harry Potter)、《魔戒》(Lord of the Rings) 同埋《占士邦》系列。佢就好直接咁答：「我地未有打算要收購任何版權，但係我一路都係《占士邦》迷。」
網上圖片
雖然卜艾格只係講自己鍾意啲咩，但係唔少讀者都喺度諗緊迪士尼係唔係真係會買起《占士邦》。喺今年年頭，迪士尼已經買左霍士影業，令到《變種特攻》、《神奇4俠》同埋《死侍》等等嘅經典角色返去Marvel。不過，好多人都唔信迪士尼會就咁收手，大家都喺估除左MCU同《星戰》系列呢兩個咁重要嘅流行文化代表之外，佢下個目標會係咩呢？
網上圖片
除左收購相關嘅話題之外，卜艾格都講埋最近大受歡迎嘅Disney+ 劇集《曼達洛人》(The Mandalorian)，特別係人見人愛嘅尤達BB，《時代》仲揀左張卜艾格抱住尤達BB嘅相做封面。佢表示：「當尤達BB隻耳仔喺張氈露出嚟嗰陣，我就知道佢一定會紅。」
卜艾格仲話2019係迪士尼嘅豐收年：「今年可能係我做左迪士尼CEO十五年以嚟，最收穫最豐富嘅一年。舊年喺呢個時候，我地肯定左同霍士嘅交易，嗰陣仲未開《星戰》樂園，Disney+仲未上線、同Hulu嘅營運權都未到手。」
網上圖片
出年迪士尼會有真人版電影《花木蘭》(Mulan) 、《黑寡婦》(Black Widow)，同埋《永恆族》(The Eternals) 。另外仲有彼思動畫《靈魂奇遇記》(Soul) 同埋《Onward》。睇嚟迪士尼會一直豐收落去。
