《壯志凌雲2》再出預告 湯告魯斯變教頭型到裂mon
美中不足嘅係，女主角換左人同埋件風褸唔同左。
網上圖片
1986年嘅《壯志凌雲》(Top Gun)令湯告魯斯 (Tom Cruise) 成為荷里活巨星，事隔三十三年再推續集《壯志凌雲：獨行俠》(Top Gun: Maverick) ，最近推出最新預告。就算靚佬湯今年已經57歲，都仲係咁靚仔。嚟到廿一世紀，電影科技日新月異，湯告魯斯將《職業特攻隊》嘅元素放入《壯志凌雲》續集，今次依然有大量空戰場面，令到觀眾極度期待。
網上圖片
《壯志凌雲2》講述空軍越嚟越依賴無人機技術，一班空軍新兵喺呢個時代嘅故事。《鼓動真我》(Whiplash)嘅邁爾斯泰勒(Miles Teller)喺電影飾演「飛鵝」(Goose)個仔，仲接受湯告魯斯飾演嘅「獨行俠 (舊譯：狂牛)」嘅訓練。
網上圖片
另外，韋基馬 (Val Kilmer) 都會重返演出做「雪人」(Ice Man) 。原版女主角莉麥基里斯（Kelly McGillis）因為畀片商太老，所以換左珍妮花康納莉（Jennifer Connelly）主演。
網上圖片
今次續集導演係《創戰紀》、《烈焰雄心》導演約瑟夫科辛斯基（Joseph Kosinski）執導、金牌監製謝利畢咸瑪（Jerry Bruckheimer）打造、《職業特攻隊5、6》導演基斯杜化麥格里（Christopher McQuarrie）負責編劇。
喺預告睇到，似乎湯告魯斯畀空軍召喚，返去做教頭。當然唔少得空戰場面，靚佬湯主動要求一打二，同兩個學員比賽，似係呼應返第一集情節，當年佢仲係新兵，又係要同師傅挑機。台前幕後係黃金陣容，劇情又充滿回憶，《壯志凌雲2》令人相當期待。
網上圖片
