• 天天有娛

「We’ll always have Hong Kong」 奇洛李維斯真係回過信畀薜凱琪？

2019年05月19日 12:31 pm

Leng Zai @ UPower

唔洗做Stalker日日「寫滿六百句的我愛你」都可以見到偶像架！ 

最近《殺神 John Wick 3》正式上畫，《殺神》系列為奇洛李維斯演藝事業嘅另一高峰。不過對於香港人嚟講，對奇洛李維斯最深印象嘅除左《生死時速》同《廿二世紀殺人網絡》之外，就一定係薜凱琪Fiona嘅成名金曲《奇洛李維斯的回信》。

其實喺2005年嘅時候，奇洛李維斯破天荒來港宣傳電影《魔間行者》，當年呢部電影喺香港做全球首映，此情此景睇怕都唔會重現。因為《奇洛李維斯的回信》街知巷聞，Fiona亦憑呢首歌一曲成名，當時TVB仲揾佢擔任客串主持喺《全線大搜查》訪問奇洛李維斯。Fiona喺訪問嘅難掩興奮之情，全程陰陰嘴喺度笑，之後仲大讚奇洛非常好人同埋有幽默感。

最重要嘅係，當年《魔間行者》喺香港首映禮嘅時候，有記者問奇洛會唔會回信畀Fiona。當時佢雖然口講話要聽左首歌先，但係當記者遞上一本印左Fiona張相嘅雜誌嗰陣，奇洛即刻喺張相隔離寫左 : 「We'll always have Hong Kong.」

原來奇洛係借用左經典愛情電影《北非諜影》入面，堪富利保加向英格烈褒曼嘅愛的宣言：「We'll always have Paris.」估唔到奇洛李維斯除左好打好戲之外，連氹女仔都咁叻。