【哥斯拉 X Marvel漫畫】《復仇者聯盟》同《變種特攻》加埋都唔夠打
遲下Marvel會唔會Crossover埋鹹蛋超人？
喺《哥斯拉II：王者巨獸》上畫之前，導演米高德格堤就講過想將復仇者引入怪獸宇宙。咁其實導演就唔係講笑，因為以前Marvel漫畫曾經Crossover哥斯拉同復仇者聯盟。唔單止係咁，哥斯拉同過變種特攻同神奇4俠決鬥。橫店迪士尼咁鍾意買嘢，不如買埋哥斯拉版權，溝埋MCU再拍返套幾套戲。
網上圖片
哥斯拉喺1954年面世，因為世界各地觀眾都鍾意哥斯拉，所以東寶早喺七十年代就將哥斯拉嘅動畫同漫畫版權，賣畀Hanna-Barbera動畫公司同埋Marvel。喺1977至1979年，Marvel出版左24冊嘅哥斯拉漫畫，嗰陣漫畫個名就同今次上畫嘅電影英文戲名一樣叫：Godzilla, King of the Monsters》。而動畫就出左兩季，總共26集。
網上圖片
Marvel漫畫喺1977年8月出版第一冊《哥斯拉》漫畫，故事講述哥斯拉由阿拉斯加登陸美國，破壞輸油管，神盾局即刻成立左「哥斯拉小隊」，成員包括：括Timothy Dugan、Gabriel Jones、Jimmy Woo同Nick Fury。但係神盾局嘅攻擊對哥斯拉一啲作用都起唔到。
網上圖片
頭兩冊漫畫都係講神盾局點樣畀哥斯拉屈機，一路到第三冊嘅時候，哥斯拉已經摧毀左成個三藩市，連地標金門大橋都畀佢破壞埋。最後變種特攻忍唔住出手，喺漫畫入面首代「蟻俠」Hank Pym用彭氏粒子將哥斯拉縮到人類咁大，但哥斯拉都冇事。之後神奇4俠出手，成功將哥斯拉打暈，再送佢返去恐龍時代。
網上圖片
可是隨後，哥斯拉再次回到現代，並在紐約展開破壞。由於「哥斯拉小隊」及神奇4俠未能阻止哥斯拉，而變種特攻則沒有現身支援，所以今次終於要出動復仇者聯盟。而哥斯拉的「終局之戰」是要攻陷帝國大廈，於是神盾局、哥斯拉小隊，神奇4俠和復仇者聯盟齊齊出擊。即使精英盡出，如雷神、鐵甲奇俠、紅女巫、幻視、神奇先生、隱形女俠、霹靂火、黃蜂女等出盡奶力，最後都只係可以同哥斯拉打個和。最後就要靠Robert Takiguchi聲淚俱下求哥斯拉離開，哥斯拉見佢咁有誠意都潛海走左。彼得柏加就梗係唔執輸，影返幾張相先走。
網上圖片
實情就係，當年東寶想同Marvel加價，要加錢先可以續約，畀漫畫繼續連載。咁所以漫畫作者Doug Moench決定喺最後整場大龍鳳，等一直冇蒲頭嘅復仇者聯盟同哥斯拉轟轟烈烈咁打返場，然後先收工。不過，咁樣並唔代表之後Marvel唔會再見到哥斯拉。例如，喺1984年嘅第181期嘅《變種特攻》，入面提到有一條神秘巨龍喺東京上空出現，幾個小朋友就拎左本怪獸圖鑑出嚟。喺圖鑑入面就見到哥斯拉嘅剪影，呢個時哥斯拉嘅英文名由「Godzilla」變成「Gojira」。
網上圖片
