【蜘蛛俠】中國「同人」小說湧現 蜘蛛俠仲好打過「美帝」原版
A：聽講蜘蛛俠係畀蜘蛛咬到，中左輻射先有超能力喎。B：唔會，中國嘅蜘蛛一定冇輻射。A：咁又係。
網上圖片
喺《復仇者聯盟4》入面，鐵甲奇俠同黑寡婦都相繼犧牲，MCU都隨即展開新階段，新生代英雄都開始接棒。而家上畫嘅《蜘蛛俠：決戰千里》講述彼得柏加嘅師父東尼史達過生而大受打擊，而且又要面對新敵人Mysterio嘅要脅。喺現實世界，超級英雄嘅最大敵人就係中國。因為有好多個中國嘅作家，推出左唔同版本嘅蜘蛛俠嘅「同人」故事，分分鐘鐘變成中國版蜘蛛俠嘅電影劇本，過多一兩個月仲會見到中國版蜘蛛俠。
大家可能會認為中國係個依法治國，尊重知識產權嘅國家，冇可能會出現中國蜘蛛俠。但係，十四億人口入面難免會有些許瑕疵，之前日本經典特攝片「鹹蛋超人」就畀中國侵權翻拍，仲要拍埋續集。《蜘蛛俠》好大機會成為下個受害者。中國多個網絡小說作家都已經推出左以蜘蛛俠為藍本嘅小說。由主角畀蜘蛛搞到由超能力，再到DIY蜘蛛絲噴射器，基本上同美國原著一模一樣。中國蜘蛛俠嘅小說包括：《變身蜘蛛俠》(作者：太上布衣)、《漫威之神眼蜘蛛俠》(作者：紫血荊棘)、《漫威之我的女兒是蜘蛛俠》(作者：六個橙子)、《都市：蜘蛛俠》(作者：心曠神怡)
網上圖片
當然，點會淨係得蜘蛛俠先會有翻版？當然仲有中國版雷神、鐵甲奇俠等等Marvel超級英雄嘅「同人」作品，但重點係每位中國作者都強調「故事及人物純屬虛構，如有雷同、純屬巧合、切勿模仿」。喺部份作品嘅簡介仲可以見到，指中國蜘蛛俠勁過美國嗰個好多。相信中國蜘蛛俠一定可以手撕蘿蔔頭。
網上圖片
如果第時有中國電影公司同呢班「作家」買改編版權翻拍做中國蜘蛛俠係一啲都唔奇，到時可能會有一班中國人爭住搶版權。
