馮盈盈拍戲被嘲喊樣核突肉酸 在家又被同居男友鬧自私唔上進
睇嚟仍要多多努力改進……
馮盈盈為《白色強人》宣傳活動，就早前播出一場她為何廣沛爆喊的戲分，她留意到被網民狠批「喊得好核突、好肉酸」。問到會否不開心？盈盈表示會想辦法改善，笑言：「前輩都話要做成功女演員，一定要喊得好靚女，但肉緊起來又好難注意表情，要多多練習。」
何廣沛、馮盈盈
無綫截圖
問到會否找男友「寶寶」幫忙練習？她笑言同居生活充滿衝突：「最近洗杯都洗到凌晨4點，因為我過得比較有生活品味，會用到水杯、酒杯、咖啡杯、香檳杯，佢就飲乜都只用一隻杯，行簡約風格，原來我哋生活都好多分歧，佢仲話我自私、唔上進、唔識改進自己，罵得都幾狠，可能佢想幫我一把，等我諗起佢便會流眼淚，其實是一片苦心。」
馮盈盈跟男友同居生活剛開始就爆衝突，她笑言男友用心良苦藉以改進她演喊戲。
網上圖片
