• 天天有娛

九位亞洲寶礦力女神 邊位令你最印象深刻？仲有位型男無人可替

2019年07月11日 05:54 pm

Leng Zai @ UPower

流汗要飲寶礦力

 寶礦力一向都形象入屋，就好似最近嘅三畫長鏡頭嘅廣告就算冇喺TVB賣廣告，都引起一陣熱議。寶礦力嘅廣告一向風格鮮明，尤其經常會起用多個香港、日本、韓國嘅年輕明星偶像，成功打入亞洲年輕人市場。今次同大家回顧一下過去九位嘅寶礦力女郎，睇下邊個至得你歡心。

1.蘇麗珊

憑藉《哪一天我們會飛》一炮而紅嘅蘇麗珊，再次同《哪》導演黃修平合作拍寶礦力廣告，喺廣告入面佢揮灑汗水落力演出，廣告出街之後大獲好評。

2.王思敏

因為演出《點五步》而為人留意嘅王思敏，而且香港寶礦力都習慣用開新人，所以拍完寶礦力嘅王思敏都因為咁而備受關注。佢喺廣告入面紮起馬尾，玩新興運動「SUP BALL」（睇廣告就知大概點玩），相當陽光。

3.金所炫

韓國新世代女神金所炫，喺廣告着住一身白色泳衣，清純健康，睇完佢賣廣告之後就唔會飲水淨係飲寶礦力。

4.TWICE


寶礦力又點會唔預埋TWICE呢，TWICE係韓國一線天團，而且係寶礦力第一次起用女團拍廣告，相當架勢。

5.朴信惠

韓國一線演員朴信惠，十一歲入行拍過《天國的階梯》、主演過唔少當紅劇集包括《皮諾丘》、《繼承者們》、《阿爾罕布拉宮的回憶》。朴信惠喺廣告入面着住一身白色連身裙，一齊放熱氣球，唔洗脫唔洗除都一樣咁吸引人。

6.綾瀨遙

相信唔少人都對綾瀨遙嘅寶礦力廣告印象深刻，着住白色比堅尼，展示完美身材，喺過廣告入面跳水、浸溫泉、追巴士、幕幕經典，因為呢個廣告令佢成為亞洲女神。

7.深田恭子

深田恭子FIT爆演出美人魚，性感形象烙印民心，其他國家嘅美人魚根本冇得比。

8.八木莉可子

八木莉可子今年十八歲，佢喺十五歲嘅時候就成為「寶礦力女郎」。佢更被稱為「第二水原希子」，喺廣告入面直接以女學生形象登場，活力十足。

9.茅島Mizuki

早前引起話題三畫面長鏡頭嘅廣告，其中搶眼喺係長髮女仔茅島Mizuki，佢今年就只係得十五歲，喺廣告入面佢展示青春形象，令佢人氣大增。其實茅島本身就零跳舞底子，佢喺開拍之前連續苦練三個星期先有咁樣嘅成效。

額外附送：金城武

雖然咁多年嘅廣告都係用女明星做主角，但其實寶礦力都揾過男明星賣廣告，佢就係亞洲男神金城武！當年嘅金城武相當靚仔有型，為寶礦力拍過唔同版本嘅廣告，其中呢個版本見到男神出浴，水點喺頭髮度慢鏡滴落嚟，真係迷死萬千女FANS。