【邊個最似】《從前有個荷里活》又有佢 盤點銀幕上嘅「偽」李小龍
有啲演員長期扮演李小龍，搞到以為自己真係李小龍，唔記得左自己係邊個。
昆頓塔倫天奴嘅新作《從前，有個荷里活》即將上畫，最左兩大巨星畢彼特同里安納度之外，其中最受關注就係喺預告入面出現嘅翻版李小龍，今次就同大家分享一下歷年最深入民心，扮過李小龍嘅演員。
真．李小龍（網上圖片）
1.Mike Moh
網上圖片
喺《從前、有個荷里活》嘅李小龍就係由韓裔演員Mike Moh飾演。Mike Moh其實就係跆拳道高手，以前曾經喺港產片《寶貝計畫》入面做過龍虎武師。早喺二零一四年，佢因為憑藉《街頭霸王》嘅網劇，飾演「阿龍」而成功上位。
2.唐龍
網上圖片
原名金泰中（或譯金泰靖）嘅唐龍，係韓國男演員。當年李小龍喺拍攝《死亡遊戲》嘅時候不幸過生，嘉禾電影公司為補拍返未完成嘅部分，就決定揾呢位唐龍去扮李小龍，完成返剩低嘅戲份。現存嘅《死亡遊戲》入面，所有唐龍嘅戲份都借位、遠鏡拍攝，或者用其他李小龍電影嘅片段去剪返入去。但係其中最經典嘅一幕，因為要拍唐龍嘅大頭鏡頭，劇組人員唔想畀觀眾睇到佢唔係李小龍，所以就用左李小龍本人嘅相，KEY返落去唐龍嘅面到。香港電影人嘅創意真係舉世無雙，四十年前就已經識用換面技術。之後呢位唐龍喺一九八一年拍左《死亡塔》，飾演李小龍嘅細佬，同埋喺一九八六年嘅《血的遊戲》扮李小龍嘅亡魂。之後就再冇唐龍嘅消息。
3.梁小龍
網上圖片
相信大家都對「火雲邪神」一啲都唔會陌生，但原來佢以前都曾經飾演過翻版李小龍。喺一九七七年，梁小龍曾經主演過《李三腳威震地獄門》。電影劇情講述李小龍過生之後，喺地獄創辦「精武門」，佢就同獨臂刀王做左好朋友，仲收埋大力水手做徒弟，然後令到楊貴紀愛上自己，之後仲會一一打低教父馬龍白蘭度、占士邦辛康納利、獨行俠奇連伊士活、盲劍客勝新太郎、吸血鬼德古拉伯爵、仲有木乃伊... ...最後就重返人間。係唔係聽見咁嘅劇情都興奮呢！有影迷就將成部《李三腳威震地獄門》上載左去youtube有興趣可以揾返嚟睇下。
4.李修賢
網上圖片
大家對李修賢嘅印象都應該仲係《公僕2》系列嘅警察形象，但其實佢後生嘅時候係邵氏小生，演出過唔少賣座電影，例如《中國超人》、《油鬼子》。不過，佢其實都有扮過李小龍，喺一九七六年嘅時候，佢同丁珮主演《李小龍與我》，劇情講述李小龍喺丁珮屋企過生嘅事，喺電影入面仲會有李修賢同丁珮床上肉搏嘅情節。值得留意嘅係，呢部《李小龍與我》係丁珮自組公司同邵氏聯合出品，丁珮為左還原當年真相，不惜出錢出力，利用自己同李小龍嘅關係，拍返部良心之作，邵氏電影為左電影藝術仲夾份打本拍戲，真不愧為香港電影之光。
5.陳國坤
網上圖片
相信陳國坤應該係現存最多人認識嘅翻版李小龍，純粹因為佢個樣生得有三分似李小龍，所以佢喺二零零八年有機會拍攝中國電視劇《李小龍傳奇》，呢部劇仲要由李小龍個女李香凝掛名做監製。而且陳國坤一直都喺唔嘅電影入扮李小龍，例如嚟緊嘅《葉問4》都會繼續扮李小龍。陳國坤最專業嘅地方就係佢個花名叫「小龍」，做翻版李小龍做到以為自己真係李小龍，呢樣嘢先最令人佩服。因為佢異常入戲，唔記得自己係陳國坤。所以做人緊要有自信。
6.李治廷
網上圖片
李治廷喺二零一零嘅時候就主演過《李小龍》，不過呢部戲只係講李小龍嘅少年故事，講到李小龍出發去美國為止。同埋，呢部電影表面上係講李小龍嘅故事，但其實就講緊五、六十年代嘅香港故事。例如日佔時期嘅香港人點生活、粵語片情懷。而且仲會講埋李小龍同佢屋企人嘅感情係點樣。呢部《李小龍》同其他翻版李小龍嘅電影完全唔同，其他戲都係力求用翻版演員做到好似李小龍一樣咁好打。但李治廷就集中喺李小龍同家人嘅關係、舊香港情懷。同李治廷演繹都係希望做到李小龍本身嘅魅力氣質，而唔係追求有幾咁好打。咁所以嚴格嚟講，李治廷唔算係翻版李小龍，佢只係飾演一個普通少年。呢個少年個名叫李振藩，屋企人都會叫佢做細鳯，拍戲嘅藝名叫李小龍。
