【從前有個荷里活】年齡有要求？ 里安納度同佢嘅索爆名模女友
今年44歲嘅里安納度，歷任女友年紀唔過25歲。
網上圖片
最近上畫嘅《從前，有個荷里活》，雲集里安納度狄卡比奧同畢彼特兩大男星。雖然畢佬離左婚，就係出晒名嘅廿孝老竇。反而現年44歲嘅里安納度，仲係年年換畫，女朋友多到數唔晒。今次就為大家精選其中十位里安納度嘅舊愛，重點介紹一下。
（註：里安納度歷任女友嘅平均年齡都係25歲或以下。)
里安納度歷任女友均年齡 網上圖片
1.狄美摩亞（Demi Moore）
網上圖片
有傳當年狄美摩亞同布斯韋利士出現婚姻危機之後，里安納度乘虛而入，兩人曾經畀人影到喺餐廳密會。狄美嘅年紀大過里安納度十二年，對於兩人嚟講係少人嘅姊弟戀。因為里安納度一眾女朋友嘅平均年齡超過廿五歲。
2.Bridget Hall
網上圖片
Bridget Hall喺九十年代出道，係第一代嘅Victoria’s Secret（VS）模特兒，亦係第一個里安納度公開嘅模特兒女朋友，佢地喺1994年拍拖，唔夠一年分手。不過，之後里安納度嘅擇偶首要條件似乎一定要係VS模特兒。
3.Gisele Bundchen
網上圖片
里安納度花心得嚟，但係又會保持戀情低調，一向都鮮有公開承認拍拖。Gisele Bundchen就係其中一個獲公開承認嘅女朋友。Gisele Bundchen係來自巴西嘅VS模特兒，曾經同里安納度一齊出席奧斯卡，最後喺2005年分手。
4.Bar Refaeli
網上圖片
里安納度同Gisele 分手之後就即刻搭上另一個VS模特兒.Bar Refaeli，一樣都係低調拍拖，兩個曾經一齊出席威尼斯影展。佢地喺2005開拍拖，喺2011年分手。
5.Blake Lively
網上圖片
里安納度曾經喺2011年同「死侍」賴恩雷諾士嘅老婆Blake Lively拍拖，當時佢地畀人影到一齊搭遊艇出海。
6.Erin Heatherton
網上圖片
同Blake Lively分手之後，里安納度都係揾返佢最愛嘅VS模特兒，今次係美國同胞Erin Heatherton，記者曾經影到佢地一齊踩單車同行沙灘拍拖，喺2012年就分手。
7.Toni Garrn
網上圖片
喺2013年，里安納度就同德國裔VS模特兒Toni Garrn拍拖，雖然兩人一齊之前，男方就同多個模特身傳緋聞。不過，里安納度似乎想認真發展，雙方仲見埋家長，可惜最後都係分手收場。
8.Nina Agdal
網上圖片
Nina Agdal係丹麥水著模特兒，2016年就同里安納度拍拖，一年後分手。
9.Lorena Rae
網上圖片
雖然里安納度年紀一路增長，但係女朋友年年廿五歲。喺2017年嘅時候，佢同另一位德國VS模特兒Lorena Rae拍拖，佢地成日畀人影一齊出街，但冇幾耐都係分手。
10. Camila Morrone
網上圖片
年近半百嘅里安納度，似乎終於揾到真愛。呢位來自阿根廷嘅現任女朋友VS模特兒Camila Morrone，佢同里安納度已經拍左兩年拖，最近仲傳會拉埋天窗，仲見埋家長。未知里安納度係唔係決心唔再做花花公子。定可能因為1997年出世Camila Morrone，今年仲未過廿五歲呢？
