郭富城兩歲囡囡萌樣曝光 要經理人小美姨姨幫手湊
小美和城城關係好好呢~
53歲的郭富城於2017年4月同內地網紅方媛（Moka）奉子成婚，愛妻三年抱兩，城城錫到燶！近日，城城忙出埠工作，城嫂又要貼身湊四個月大「二寶」Charlotte，下月兩歲生日的大女Chantelle就拜託經理人小美姨姨幫手湊！
去年城城53歲牛一，同妻女溫馨位體晒生。
郭天王上月完成內地巡唱後，近日又忙出埠拍廣告，據悉還要開拍新戲，再接住中秋節四度登上台北小巨蛋舉辦「舞林密碼」巡演，特別忙！湊女大任就交給愛妻方媛、外母同埋他位早已融入家中的經理人小美！早前，城嫂坐月時，已有報道話小美一星期幫城城湊女兩次，還帶小公主去維園追鴿，又影相又擔遮擋雨，十足十保母，超愛錫小Chantelle。
早前，方媛上載兩夫婦手拖Chantelle到公園照片，慶祝國際兒童節。
上周六（24日）下午，小美姨姨見Chantelle留在家中這麽悶，一於叫埋方媛母親帶孫女去銅鑼灣利園shopping。當日5時左右，兩歲Chantelle紮上其招牌辮仔，穿上粉紅色上衣、牛仔褲配布鞋仔，好smart地跟婆婆及小美姨姨出街街。三人去利園2期的童裝樓層逛街，兩位長輩左右拖實小公主，見Chantelle全程眼仔碌碌四圍望好乖女，全無扭計。
城城童年照
方媛童年照
正面曝光的Chantelle，似足父母童年混合體，一字眉勁似爸爸，鼻嘴就似媽媽。其後，小美帶Chantelle入了梁詠琪間童裝店幫襯，揀了幾件衫仔給兩小姊妹，爽手碌卡走人。店員見小妹妹聽教聽話又得意，送了個汽球畀佢玩。搭扶手電梯時，Chantelle終於露出真性情，似足爸爸那樣紮紮跳，只見婆婆話了兩句，Chantelle馬上站好，乖乖豬跟着兩人下樓等七人車返家。
Chantelle一字眉勁似Daddy，鼻嘴就copy媽咪。
兩歲Chantelle好乖巧，拖實婆婆和小美姨姨全無扭計。
小美其後發現記者，好保護Chantelle，叫方媛媽抱實粒孫避上鏡。
唯一作反，係Chantelle搭扶手電梯時突然紮紮跳。
